კარლსონის ინტერვიუ პუტინთან

 

გავლენიანი გამოცემა Politico გვთავაზობს ამერიკელი ჟურნალისტის, ტაკერ კარლსონის მიერ პუტინთან ჩაწერილი 2 საათიანი ინტერვიუს 9 (Politico-ს აზრით)  მთავარ მომენტს, რაც გვგონია რომ “გურია TV”-ის მკითხველს დააინტერესებს და მათთვის ვთარგმნეთ. ამ მიმოხილვის  ავტორები, ევა ჰართოგი და სერგეი გორიაშკო ინტერვიუს პუტინთან „სიყვარულობანას“ უწოდებენ.

ცოტანი ელოდნენ რაიმე ღირებულს ტაკერ კარლსონის მიერ სამშაბათს, 06.02.2024, მოსკოვში ჩაწერილი ამ ინტერვიუსგან. მოლოდინების საწინააღმდეგოდ, კარლსონის ინტერვიუ იყო კომფორტული პუტინისთვის და ვერ მოგვაწოდა რაიმე ინფორმაცია რუსეთის პრეზიდენტის გეგმებზე მიმდინარე ომში. პუტინმა შანსი სათავისოდ გამოიყენა და შეეცადა ეჭვები დაეთესა როგორც ამერიკის მიერ უკრაინისთვის დახმარების მიწოდებაზე, ასევე აშშ-ის პოლიტიკურ სისტემაზე.

1. პუტინს თავისი ომი ჯერ არ დაუმთავრებია

რუსეთის პრეზიდენტის მთავარი მესიჯი ამერიკელებისთვის იყო: უაზრობაა უკრაინას დაეხმარონ მეტი ფულით და იარაღით.

„თუკი თქვენ მართლა გსურთ ბრძოლის შეჩერება, თქვენ უნდა შეაჩეროთ იარაღის მიწოდება. ასეთ შემთხვევაში, ბრძოლა რამდენიმე კვირაში დამთავრდება. სულ ეს არის.“ – განაცხადა პუტინმა და ისიც დაამატა, რომ ამერიკელების მოვალეობაა უთხრან უკრაინას, მიუსხდნენ მოლაპარაკების მაგიდას.

კითხვაზე, შეასრულა თუ არა თავისი საომარი მიზნები უკრაინაში, პუტინმა უპასუხა:

„არა. ჩვენ ჯერ ვერ შევასრულეთ ჩვენი მიზნები, რადგან ერთ-ერთი მიზანი დენაციფიკაციაა.“ (დენაციფიკაცია მისთვის გულისხმობს დემოკრატიულად არჩეულ პრეზიდენტს, ებრაული ფესვების მქონე ვოლოდიმირ ზელენსკის.)

კითხვას, დაკმაყოფილდებოდა თუ არა ამჟამად ოკუპირებული ტერიტორიებით, რუსმა ავტოკრატმა პასუხი არ გასცა და მიუბრუნდა დენაციფიკაციას. სტატიის ავტორები ამ კითხვის პასუხად „არა“-ს მიიჩნევენ.

2. პუტინი შეეცადა შეერყია ამერიკელების რწმენა დემოკრატიისადმი

ამ ინტერვიუთი პუტინმა მიიღო წვდომა დიდ ამერიკულ აუდიტორიაზე მომავალი აშშ საპრეზიდენტო არჩევნების წინ. კარლსონი ვის დაუჭერს მხარს ტრამპი ვერსუს ბაიდენი, საიდუმლო არაა. მაგრამ პირველი იყო არა კარლსონი, არამედ პუტინი, ვინც ტრამპი ახსენა და თქვა, რომ მას კარგი ურთიერთობა აქვს ტრამპთან, ისევე როგორც ჯორჯ ბუშთან.

პუტინმა ამერიკული დემოკრატია ჭაობს და ილუზიას შეადარა, რომელიც ხალხის არჩევნების შედეგად კი არა, ელიტების სურვილებით იმართება.

3. კრემლის პროპაგანდისტები აღწევენ წარმატებას

კარლსონმა ვერ შეძლო ფაქტების გადამოწმება და უბრალოდ გააფრთხილა მსმენელები, რომ პუტინმა დიდხანს, შეიძლება ნახევარი საათი ისაუბრა ისტორიაზე და მეცხრე საუკუნემდე ჩავიდა. შემდეგ მან პუტინს გულწრფელი უწოდა და ენციკლოპედიური ცოდნის მქონედ მონათლა. ჟურნალისტმა ყველა თემა აარიდა რესპოდენტს, რომელიც შეიძლება მისთვის არასასიამოვნო ყოფილიყო: ბუჩა, მარიუპოლი და ომის სხვა დანაშაულებები, პუტინის დაკავებაზე გაცემული სასამართლო ბრძანება, დაკავებული პოლიტიკური ოპონენტები, მობილიზაცია და ომის მსხვერპლთა რიცხვი. არ ჰკითხა მომავალ რუსულ საპრეზიდენტო არჩევნებზე რაიმე და არც არჩევნებიდან მოხსნილ ომის მოწინააღმდეგე ბორის ნადეჟდინზე.

4. პუტინი განაგრძობს ელონ მასკზე შეტევას

ელონ მასკმა თავიდან მხარი უკრაინას დაუჭირა, მაგრამ შემდეგ რუსული პროპაგანდის ანკესი გადაყლაპა და სხვა საუბარი დაიწყო. ინტერვიუში პუტინმა მასკის ეგოსაც გაჰკრა კბილი.

პუტინმა ახსენა, რომ „მასკმა უკვე ჩანერგა იმპლანტური ჩიპი ადამიანის ტვინში და ის არ გაჩერდება. მასკი ისე მოიქცევა, როგორც მას აწყობს. რაიმე გზა უნდა გამოინახოს მის შესაჩერებლად.“

5. პუტინი მზადაა პატიმრების გაცვლა დაიწყონ

ღია კითხვა იყო, კითხავდა თუ არა რამეს კარლსონი პუტინს ივან გერშკოვიჩის შესახებ. Wall Street Journal-ის რეპორტიორი ერთი წელია რუსეთშია დაკავებული და ამას ტრამპთან დაკავშირებულ შპიონაჟის საქმეს უკავშირებენ. კარლსონმა იკითხა გერშკოვიჩზე და პუტინმა თქვა, რომ მის გაცვლას ტაბუ არ ადევს და მიანიშნა, რომ გერშკოვიჩს გაცვლიან „პერსონაში, რომელიც სასჯელს იხდის აშშ-ის მოკავშირე ქვეყანაში.“ როგორც ივარაუდება, ეს პერსონა ვლადიმირ კრასიკოვია, ეფესბეს აგენტი, ზელიმხან ხანგოშვილის მკვლელობისთვის რომ სამუდამო პატიმრობა აქვს მისჯილი გერმანიაში.

6. აშშ-რუსეთის საკომუნიკაციო არხები ღია რჩება

პუტინმა თქვა რომ არ ახსოვს, როდის ელაპარაკა ბოლოს ბაიდენს ან საერთოდ, რატომ უნდა ველაპარაკოო, თუმცა დაამატა, რომ გარკვეული კონტაქტები შენარჩუნებულია ვაშინგტონსა და მოსკოვს შორის.

7. კარლსონს ბევრი დრო აქვს პუტინისთვის

აქ სტატიის ავტორები ითვლიან ვის რამდენი წუთი დაუთმო ინტერვიუსთვის კარლსონმა. პირველ ადგილზეა ადამიანების ტრეფიკინგში მხილებული ენდრიუ ტეიტი, მეორეზე – პუტინი, მესამეზე – დონალდ ტრამპი და მეოთხეზე – ვიქტორ ორბანი.

8. პუტინს სურს, ნორდ სტრიმის აფეთქება ამერიკელებს დაბრალდეთ

რუსეთიდან გერმანიაში ზღვის ქვეშ გამავალი გაზის მილების აფეთქება 2022 წლის სექტემბერში ვისი ბრალიაო, რომ იკითხა კარლსონმა, -„თქვენი, რა თქმა უნდაო,“- უპასუხეს ამერიკელს.

9. ყველაზე WTF მომენტი

ინტერვიუს განმავლობაში რომ იკითხავდი, WTF აქ რა ხდებაო, ასეთ მომენტად სტატიის ავტორები მიიჩნევენ კარლსონისთვის ასლების გადაცემას. მე-17 საუკუნის წერილების ასლებით, დაწერილი ბოგდან ხმელნიცკის მიერ, პუტინი ამტკიცებს, რომ ის არაფერს იგონებს. მერე დაამატა, რომ კარლსონს შეუძლია, ეს წერილები ინგლისურად მოგვიანებით თარგმნოს.

ფოტო: Photo Illustration by The Daily Beast / Getty