„კამერამ იმაზე მაღალი სიჩქარეები დააფიქსირა, ვიდრე კონკრეტული მანქანები ავითარებენ“ – რა ხდება დასავლეთის ავტომაგისტრალზე

ბოლო დღეების განმავლობაში, დასავლეთ საქართველოს ავტომაგისტრალზე სიჩქარის გადაჭარბების ჯარიმებზე, სოციალურ ქსელში არაერთმა ადამიანმა დაწერა.

მოქალაქეები აღნიშნავენ, რომ მაგალითად, იგოეთთან, კამერამ იმაზე დიდი სიჩქარე დააფიქსირა, ვიდრე ავტომობილი მოძრაობდა. მეტიც, ზოგიერთი მოქალაქე საკუთარი ავტომობილის მოდელს უთითებს და წერს, რომ ძრავის მოცულობიდან გამომდინარე, ჯარიმაში აღნიშნული სიჩქარით ავტომობილი ფიზიკურად ვერ იმოძრავებდა.

მეტი დამაჯერებლობისთვის, მოქალაქეები ჯარიმის ქვითრებს ვიდეორეგისტრატორის მიერ დაფიქსირებულ კადრებსაც ურთავენ, სადაც ჩანს, რომ ავტომობილს დაშვებული სიჩქარისთვის არ გადაუჭარბებია.

როგორც საავტომობილო ფედერაციის ვიცე-პრეზიდენტი მევლუდ მელაძე „ბიზნესპრესნიუსთან“ ამბობს, მოქალაქეების პრეტენზიების სიმრავლე და წარმოდგენილი მტკიცებულებები მოწმობს, რომ დიდი ალბათობით, კამერების გაუმართაობასთან გვაქვს საქმე. საკითხის მოკვლევა კი, მისი თქმით, შესაბამისმა ორგანომ უნდა განახორციელოს.

„ამ საკითხთან დაკავშირებით მეც არაერთი პოსტი შემხვდა სოციალურ ქსელში. რა თქმა უნდა, არსებობს ძალიან დიდი ალბათობა, რომ ტექნიკურ ხარვეზთან გვქონდეს საქმე. მით უფრო, როგორც მოქალაქეები წერენ (და ასეთი ძალიან ბევრია), კამერამ იმაზე მაღალი სიჩქარეებიც კი დააფიქსირა, ვიდრე კონკრეტული მარკის და მოდელის მანქანები ავითარებენ ანუ რისი რესურსიც აქვთ.

ამ დროს აუცილებელია შეტყობინების გაგზავნა (გნებავთ ოფიციალურად მიმართვა) შესაბამისი ორგანოსთვის, რომ მოკვლევა დაიწყოს, დადგინდეს მიზეზები და თუ ტექნიკური ხარვეზია, გამოსწორდეს. სამწუხაროდ, ჩვენთან ამის არც კულტურაა და ალბათ, არც ნდობის მომენტი“, – ამბობს მევლუდ მელაძე.

„ბიზნესპრენისუსი“ აღნიშნული საკითხზე შსს-საც დაუკავშირდა, უწყების პასუხს, მიღებისთანავე შემოგთავაზებთ.

www.bpn.ge