იურიდიულ საკითხთა კომიტეტის სხდომაზე ოპოზიციური პარტიების აკრძალვას I მოსმენით მხარი დაუჭირეს.
ივანიშვილის წარმომადგენელმა, თორნიკე ჭეიშვილმა კანონპროექტის წარდგენისას თქვა, რომ აღნიშნული ცვლილებები ითვალისწინებს სამართლებრივ მექანიზმებს “არაკონსტიტუციური პარტიების აკრძალვის შემდეგ სხვა სახელწოდების თუ სხვა შეფუთვის ქუდქვეშ მათი პოლიტიკური რეინკარნაციის პრევენციის მიზნით”.
“ზოგადად, არაკონსტიტუციური მისწრაფებების მქონე პარტიის აკრძალვა ეს არის თავდაცვისუნარიანი დემოკრატიის კონცეფციის ერთ-ერთი ნაწილი. ამის გათვალისწინებით, საქართველოს კონსტიტუცია – 23 მუხლი, მე-60 მუხლი, ადგენს შესაბამის პროცედურებს, რაც შეიძლება გახდეს პარტიის აკრძალვის საფუძველი. თუმცა, ამავდროულად, მნიშვნელოვანია, რომ კანონმდებლობა ითვალისწინებდეს ეფექტიან სამართლებრივ მექანიზმებს არაკონსტიტუციური პარტიების აკრძალვის შემდეგ სხვა სახელწოდების თუ სხვა შეფუთვის ქუდქვეშ მათი პოლიტიკური რეინკარნაციის პრევენციის მიზნით.
მნიშვნელოვანია, რომ კანონში გაიწეროს რეგულაციები, რაც პარტიის აკრძალვის შესახებ საკონსტიტუციო სასამართლოს ეფექტს კიდევ უფრო სრულფასოვან მასშტაბს შესძენს და ფიქციური, აკრძალული პარტიების ე.წ. მემკვიდრე პარტიების შექმნით და საქმიანობით საკონსტიტუციო სასამართლოს გადაწყვეტილების დაძლევის შესაძლებლობას მინიმუმამდე დაიყვანს.
ამ მიზნით შემოთავაზებულია ცვლილებები:
მოქალაქეთა პოლიტიკური გაერთიანებების შესახებ საქართველოს ორგანული კანონის 36-ე მუხლს ემატება მეორე პუნქტი, რომლის მიხედვითაც საკონსტიტუციოს შეეძლება აკრძალოს პარტია, თუკი მისი გაცხადებული მიზანი ან საქმიანობის არსი, მათ შორის, პერსონალური სიის შემადგენლობა ან წარდგენილი სიის შემადგენლობა არსებითად იმეორებს აკრძალული პარტიის მიზნებსა და საქმიანობის არსს.
შესაბამის სარჩელზე გადაწყვეტილების გამოტანის ვადა კვლავინდებურად შესაძლოა იყოს 9 თვე, თუმცა როცა ლაპარაკია საარჩევნო პერიოდზე და ე.წ. მემკვიდრე პარტიაზე სარჩელის განხილვის ვადა შესაძლოა უკავშირდებოდეს 14 დღეს”. – თქვა ჭეიშვილმა.
კანონპროექტი ბიუროზე 31 მარტს დარეგისტრირდა. აღნიშნულს წინ უსწრებდა მამუკა მდინარაძის განცხადება, რომ “ენმ-ს მემკვიდრე პარტიების არაკონსტიტუციურად აღიარების კანონპროექტი” წარადგინეს.
“წარმოდგენილი კანონპროექტის მიღებით, საკონსტიტუციო სასამართლოს ექნება შესაძლებლობა განახორციელოს ეფექტიანი საკონსტიტუციო კონტროლი პოლიტიკური პარტიებზე, რომელთა მიზანია საქართველოს კონსტიტუციური წყობილების დამხობა ან ძალადობით შეცვლა, ქვეყნის დამოუკიდებლობის ხელყოფა, ტერიტორიული მთლიანობის დარღვევა ან რომელიც ეწევა ომის ან ძალადობის პროპაგანდას, აღვივებს ეროვნულ, ეთნიკურ, კუთხურ, რელიგიურ ან სოციალურ შუღლს.
შესაბამისად, იმ პირებს, რომლებსაც აქვთ სურვილი კვლავ ზემოაღნიშნული პარტიების არსებითად მსგავსი ახალი პარტიები დააფუძნონ და კვლავ განაგრძონ არაკონსტიტუციური საქმიანობა, სასამართლო წესით აეკრძალებათ ასეთი ფიქციური პარტიების მეშვეობით მოქმედება.” – წერია ოცნების მიერ წარდგენილ კანონპროექტში.
Loading ...