ირანში მომხდარ 5.1 მაგნიტუდის სიმძლავრის მიწისძვრას სულ მცირე 1 ადამიანის სიცოცხლე ემსხვერპლა, დაშავებულია 7 მოქალაქე, – ამის შესახებ ინფორმაციას მედიასაშუალებები ქვეყნის ჯანდაცვის სამინისტროს ოფიციალურ წარმომადგენელზე დაყდნობით ავრცელებენ.
მათივე ინფორმაციით, მიწისძვრა ქალაქ დამავანდთან ახლოს, თეირანიდან დაახლოებით 55 კილომეტრში, ადგილობრივი დროით 00:48 საათზე მოხდა. ძლიერი მიწისქვეშა ბიძგები თეირანსა და ახლომდებარე ქალაქებში იგრძნობოდა.
მიწისძვრის ეპიცენტრი ვულკანური მთა დამავანდის სამხრეთით დაფიქსირდა.
შეგახსენებთ, მიმდინარე წლის 23 თებერვალს თურქეთ-ირანის საზღვართან ახლოს მომხდარ 5,7 მაგნიტუდის სიმძლავრის მიწისძვრას 9 ადამიანის სიცოცხლე შეეწირა.
ყველაზე დიდი მსხვერპლი კი ირანში 1990 წელს მომხდარმა მიწისძვრამ გამოიწვია. მიწისძვრამ, რომლის სიმძლავრე 7.4 მაგნიტუდა იყო, 40 000 ადამიანის სიცოცხლე შეიწირა, დაშავდა 300 000 და უსახლკაროდ დარჩა ნახევარი მილიონი მოქალაქე.
Loading ...