ირანის ხელისუფლების განცხადებით, უკრაინული თვითმფრინავი შემთხვევით ჩამოაგდეს

ირანის ხელისუფლების განცხადებით, თეირანის აეროპორტთან უკრაინული თვითმფრინავი სამხედროებმა შემთხვევით ჩამოაგდეს. განცხადება ამის შესახებ შაბათს გამთენიისას, სახელმწიფო ტელევიზიის ეთერით გაკეთდა.

ირანის შეიარაღებული ძალების გენერალური შტაბი მომხდარს „ადამიანურ შეცდომას“ უწოდებს. ირანის სახელმწიფო ტელევიზიის ინფორმაციით, მომხდართან კავშირში მყოფი პირები პასუხს აგებენ.

ოფიციალური ირანი რამდენიმე დღის განმავლობაში უარყოფდა, რომ თვითმფრინავი ნასროლი რაკეტით ჩამოაგდეს.

„უკრაინის ავიახაზების“ კუთვნილი ავიალაინერი 8 იანვარს, თეირანის აეროპორტის სიახლოვეს, აფრენიდან ორ წუთში ჩამოვარდა. ბორტზე 167 მგზავრი და ეკიპაჟის ცხრა წევრი იმყოფებოდა, ყველა მათგანი დაიღუპა.