ირანის პრეზიდენტმა CNN-თან დაგეგმილი ინტერვიუ გააუქმა , რადგან წამყვანმა მისი მოთხოვნა არ შეასრულა

ირანის პრეზიდენტმა, ებრაჰიმ რაისმა ტელეკომპანია „სიენენის“ წამყვანთან, დაგეგმილი ინტერვიუ იმის გამო გააუქმა, რომ წამყვანი პრეზიდენტის მოთხოვნას თავსაბურავის გაკეთების შესახებ არ დაეთანხმა.

როგორც CNN წერს,  ინტერვიუმდე 40 წუთით ადრე ირანის პრეზიდენტის თანაშემწმემ წამყვანს შესთავაზა, რომ თავსაბურავი გაეკეთებინა, რაზეც ქრისტიან ამანპურმა უარი განაცხადა.

ქრისტიან ამანპური ირანის დედაქალაქში, თეირანში გაიზარდა. წამყვანის თქმით, ის ყოველთვის იკეთებს თავსაბურავს, როცა ირანში მუშაობს, რადგან სხვა შემთხვევაში ირანში ჟურნალისტური საქმიანობის შესრულება შეუძლებელია. ირანის ფარგლებს გარეთ კი, სადაც ეს მოთხოვნა არ არსებობს, თავშალის გაკეთებას არ აპირებს.

„აქ, ნიუ იორკში ან ირანის ფარგლებს გარეთ ნებისმიერ ადგილას, ირანის არც ერთ პრეზიდენტს და 1995 წლის შემდეგ ყველა მათგანთან მქონია ინტერვიუ, არასდროს უთხოვია, რომ თავსაბურავი გამეკეთებინა. ძალიან ზრდილობიანად ვთქვი უარი თავსაბურავის გაკეთებაზე ჩემი, „სიენენის“ და ყველა ქალი ჟურნალისტის სახელით, იმიტომ რომ ეს არ არის მოთხოვნა“, – განაცხადა ამანპურმა.

შეგახსენებთ, ირანში საპროტესტო აქციები გრძელდება. აქციები მაჰსა ამინის გარდაცვალების შემდეგ დაიწყო, როდესაც თეირანში ქალი 13 სექტემბერს მორალის პოლიციამ დააპატიმრა და სასიკვდილოდ სცემა. დაკავებიდან რამდენიმე საათში, ამინი საავადმყოფოში გადაიყვანეს, სადაც სამ დღეში გარდაიცვალა. მომხდარის შემდეგ, ქვეყნის დიდი ნაწილი, მათ შორის დედაქალაქი დემონსტრაციებმა მოიცვა. ირანელმა ქალებმა ჰიჯაბები სახალხოდ დაწვეს.