ირაკლი კობახიძე – სამწუხაროა, რომ ოდესღაც ცნობილი შვეიცარიული საბანკო სისტემა, რომელიც განთქმული იყო საიმედოობით, დღეს გამოიყენება პოლიტიკური შანტაჟისთვის

სამწუხაროა, რომ ოდესღაც ცნობილი შვეიცარიული საბანკო სისტემა, დღეს პოლიტიკური შანტაჟისთვის გამოიყენება – როგორი შანტაჟიც არ უნდა განხორციელდეს, ბიძინა ივანიშვილი არცერთ შემთხვევაში არ დათმობს ამ ქვეყნის სასიცოცხლო ინტერესებს,- ამის შესახებ  ირაკლი კობახიძემ ბიძინა ივანიშვილსა და შვეიცარიული ბანკ Julius Baer-ს შორის დავის თაობაზე ჟურნალისტებს განუცხადა.

მისი თქმით, აღნიშნული ბანკის მიერ ივანიშვილის მიმართ განხორციელებულ ქმედებებს პოლიტიკური საფუძველი აქვს.

„სრულიად აშკარაა, რომ ამ ყველაფერს აქვს მკაფიოდ პოლიტიკური საფუძველი. იცით, რომ ბიძინა ივანიშვილის ანგარიშის ძარცვა დაიწყო 2008 წელს, მას შემდეგ, რაც ბიძინა ივანიშვილმა უარი თქვა მიხეილ სააკაშვილთან ყოველგვარ კომუნიკაციაზე. რაც შეეხება ახალი ეტაპის პრობლემებს, ეს პრობლემები შეიქმნა უკრაინაში ომის დაწყების შემდეგ, როდესაც საქართველოს მიმართ წამოვიდა კონკრეტული მოთხოვნა, რაზეც არ დავეთანხმეთ შესაბამის სუბიექტებს და ამასთან დაკავშირებით წარმოექმნა პრობლემები ბატონ ივანიშვილსაც, როდესაც გაიყინა თანხები მის ანგარიშზე შვეიცარიულ ბანკში. ეს არის თავიდან ბოლომდე პოლიტიკური. საერთაშორისო მედიაში რა კოორდინაციასაც ვხედავთ, ამასაც, თავიდან ბოლომდე პოლიტიკური საფუძველი აქვს. ეს ყველაფერი გამოიყენებოდა შანტაჟის ინსტრუმენტად ბიძინა ივანიშვილის წინააღმდეგ. ვხედავთ, რომ ეს პროცესი გრძელდება.

კიდევ ერთხელ უნდა ითქვას ერთი მარტივი რამ – როგორი შანტაჟიც არ უნდა განხორციელდეს, ბიძინა ივანიშვილი არცერთ შემთხვევაში არ დათმობს ამ ქვეყნის სასიცოცხლო ინტერესებს. იცით, რომ 2011 წელს ის პოლიტიკურ პროცესში შემოვიდა ძალიან დიდი რისკის ფასად. ყველაფერი გვერდზე გადადო იმის გამო, რომ იმ მომენტში ეს იყო ერთადერთი უალტერნატივო გზა ქვეყნის ინტერესების დაცვისთვის. ასე იყო 2022 წელსაც, მიუხედავად იმისა, რომ იყო ძალიან სერიოზული ზეწოლა, შანტაჟი. არცერთ ეტაპზე არც კი უფიქრია ვინმეს ისეთი ნაბიჯების გადადგმა, რომელიც ჩვენი ქვეყნის განადგურებასთან იქნებოდა დაკავშირებული. შესაბამისად, ცალსახად ეს არის პოლიტიკური შანტაჟი. სამწუხაროა, რომ ოდესღაც ცნობილი შვეიცარიული საბანკო სისტემა, რომელიც განთქმული იყო თავისი საიმედოობით, დღეს გამოიყენება პოლიტიკური შანტაჟისთვის. ამით ანგრევენ რეალურად თვითონ შვეიცარიულ ბანკებს. მაგალითად Credit Suisse-ის აქციების ფასი 100-ჯერ და მეტადაა გაუფასურებული. თავის დროზე თუ Credit Suisse-ის აქციის ფასი 80 ფრანკი იყო, დღეს 1 ფრანკსაა ჩამოცილებული. ამით სარგებლობენ კონკრეტული სუბიექტები, რომლებიც იაფად ყიდულობენ შესაბამის აქციებს. ეს არის თავიდან ბოლომდე პოლიტიკური კოორდინაციის შედეგი. იყო კონკრეტული ძალიან მძიმე მანკიერი ინტერესი ჩვენი ქვეყნის მიმართ, რაც ჩვენი ქვეყნის განადგურებას, „მეორე ფრონტის“ გახსნას ითვალისწინებდა. სწორედ ამას უკავშირდება ეს პოლიტიკური ინტერესები, რის გამოც ხდება შვეიცარიული ბანკების გამოყენება ბიძინა ივანიშვილის წინააღმდეგ“,- განაცხადა ირაკლი კობახიძემ.