ჩრდილოეთ ინდოეთში, ბიჰარისა და უტარ-პრადეშის შორის საზღვართან, მდინარე განგის სანაპიროებზე, ასამდე ადამიანის ცხედარი აღმოაჩინეს.
ჯერჯერობით უცნობია, როგორ აღმოჩნდა ცხედრები აღნიშნულ ტერიტორიაზე, მაგრამ ადგილობრივი მედიის ცნობით, გარდაცვლილები, სავარაუდოდ, კოვიდ- 19- ის მსხვერპლნი არიან.
ცხედრების მდგომარეობა მიანიშნებს, რომ ისინი მდინარეში უკვე რამდენიმე დღეა არიან. ექსპერტებმა განაცხადეს, რომ გვამები გაბერილი და ნაწილობრივ დამწვარი იყო .
ადგილობრივმა მკვიდრებმა ჟურნალისტებს განუცხადეს, რომ აქაურებს უკიდურესად უჭირთ, პანაშვიდის ხარჯები და კრემაციისთვის საჭირო ხე-ტყეც კი არა აქვთ. ამიტომ იძულებულნი არიან ახლობლების ცხედრები პირდაპირ მდინარეში ჩაყარონ.
ადგილობრივი მკვიდრი ჩანდრა მოჰანი: “კერძო საავადმყოფოები ხალხს ძარცვავენ. უბრალო ადამიანებს მღვდილის მოსაყვანი თანხაც აღარ აქვთ. რადგან მღვდლები 2000 რუპიას [27 აშშ დოლარს] ითხოვენ. ამიტომ ხალხისთვის ამ სიტუაციაში ერთადერთი გამოსავალი მდინარეა.
უტარ-პრადეში ინდოეთის ყველაზე დასახლებული შტატია.
ინდოეთი ახლა გლობალური პანდემიის ეპიცენტრია. ბოლო კვირების განმავლობაში სიკვდილიანობამ ქვეყანაში იმდენად იმატა, რომ ქვეყნის კრემატორიუმების უმეტესი ნაწილი ვეღარ ფუნქციონირებს.
ჯონ ჰოპკინსის უნივერსიტეტის მონაცემებით, პანდემიის დაწყებიდან ინდოეთში კორონავირუსის 22,6 მილიონზე მეტი შემთხვევა და 246,116 გარდაცვალება დაფიქსირდა .ექსპერტების აზრით კი, დაღუპულთა რეალური რაოდენობა შეიძლება ბევრად უფრო მაღალი იყოს.
Loading ...
