ივანე მაჭავარიანი კლინიკაში იყო მოთავსებული

„ინტერპრესნიუსის“ ინფორმაციით, ფინანსთა ყოფილი მინისტრი ივანე მაჭავარიანი კლინიკაში მოათავსეს.

წყაროს ინფორმაციით, მაჭავარიანი ხუჯაძე-გოგნიაშვილის კლინიკაში დაზიანებებით გადაიყვანეს.

„ინტერპრესნიუსი“ ინფორმაციის გადასამოწმებლად კლინიკას დაუკავშირდა, სადაც განუცხადეს, რომ პაციენტის შესახებ ინფორმაცია კონფიდენციალურია. კლინიკაში არც იმას აზუსტებენ უკვე დატოვა თუ არა ფინანსთა ყოფილმა მინისტრმა საავადმყოფო.

„სამწუხაროდ, ვერაფერს გეტყვით. ვერანაირ ინფორმაციას დაგიდასტურებთ და ვერც უარვყოფთ“,- აცხადებენ კლინიკაში.

არსებული ინფორმაციით, ივანე მაჭავარიანი იმ დღეს, როდესაც მან თანამდებობიდან გადადგომის შესახებ განცხადება გააკეთა, უკვე კლინიკაში იმყოფებოდა.

ინფორმაციის გადასამოწმებლად ასევე დავუკავშირდით ივანე მაჭავარიანსაც, თუმცა ის არც სატელეფონო ზარებს და არც შეტყობინებებს არ პასუხობს.

მოგვიანებით განცხადება გაავრცელა ივანე მაჭავარიანმა. ის აცხადებს, რომ მან კლინიკაში ძგიდის და პოლიპის ოპერაცია გაიკეთა.

როგორც მაჭავარიანი სააგენტოსთან საუბარში განმარტავს, მან ქირურგიული ჩარევა თანამდებობის დატოვებამდე დაახლოებით, 10 დღით ადრე გაიკეთა.

„ახლა ვიმყოფები სახლში, აბსოლუტურად ჯანმრთელი ვარ, კლინიკაში მოთავსებული არ ვიყავი, თუ ძველ ამბავს მეუბნებით, ჩემი მინისტრობის პერიოდის ამბავია, წასვლამდე დაახლოებით, 10 დღის, 2 კვირის ამბავია, პოლიპი გამიკეთეს და ცოტა ძგიდე გამისწორეს, მაგრამ ეს იყო 20-წუთიანი თემა, მეტი არ ვიცი და თუ თქვენ რამე იცით ვინმემ, მითხარით. ეს ჩემ წასვლამდე ამბავი იყო, კლინიკაში გავიკეთე და წამოვედი“, – აცხადებს მაჭავარიანი.

www.interpressnews.ge