საქართველოს ჯანდაცვის მინისტრის მოადგილის თამარ გაბუნიას თქმით, დღევანდელი მდგომარეობით ღამე გადაადგილების შეზღუდვის მოხსნა აღდგომის ღამეს არ იგეგმება და ყველაფერი დარჩება ისე, როგორც არის.
საკოორდინაციო საბჭოს სხდომის დასრულების შემდეგ გამართულ ბრიფინგზე თამარ გაბუნიამ ზოგადად არ გამორიცხა, რომ დამატებით შეზღუდვების დაწესების საკითხიც დადგეს იმის გათვალისწინებით, როგორი იქნება ეპიდემიოლოგიური ვითარება ქვეყანაში:
„ჩვენ კიდევ გასავლელი გვაქვს მანამდე კიდევ 10 დღე, ვიდრე მივალთ სააღდგომო დღესასწაულებამდე. და ეს 10 დღე ხშირ შემთხვევაში ცვლის ეპიდემიოლოგიურ სურათს. ასე რომ უნდა კიდევ ვნახოთ რა მიმართულებით განვითარდება მოვლენები ეპიდემიოლოგიური კუთხით, რომ დამატებით შეზღუდვებზე შესაძლოა დადგეს საკითხი. რა თქმა უნდა, ამას ვერ გამოვრიცხავთ დღევანდელი მდგომარეობით“, – განაცხადა თამარ გაბუნიამ. მისი თქმით, რელიგიური მსახურების პროცესში ის წესები უნდა იყოს დაცული, რომელიც უკვე აპრობირებულია უსაფრთხოების კუთხით:
„ის წესები, რაც ჩვენ აქამდეც არაერთხელ გავიარეთ საპატრიარქოსთან ერთად, რაც ქმნის ზოგადად ეპიდემიურად უსაფრთხო გარემოს რელიგიური მსახურების პროცესში, ეს ყველასთვის ცნობილია და ბუნებრივია, სააღდგომო დღესასწაულებზეც ამ წესების დაცვით მნიშვნელოვნად მიგვაჩნია ჩვენ პროცესების ჩატარება“, – აღნიშნა თამარ გაბუნიამ.