თბილისში კიდევ ერთი ქალი მოკლეს (+ვიდეო)

თბილისში ფემიციდის კიდევ ერთი შემთხვევა მოხდა. როგორც რადიო თავისუფლებას უთხრეს შინაგან საქმეთა სამინისტროში, 52 წლის ქალი “რამდენიმე დღის წინ” მოკლეს.

უწყებამ მომხდარ ფაქტთან დაკავშირებით განცხადება 9 ოქტომბერს გაავრცელა.

საგამოძიებო მოქმედებების შედეგად, სამართალდამცავებმა განზრახ მკვლელობის ბრალდებით დააკავეს 1983 წელს დაბადებული, წარსულში ნასამართლევი პ.პ.

გამოძიებით დადგინდა, რომ ბრალდებულმა მამაკაცმა, შურისძიების მოტივით, 1970 წელს ო.პ.-ს, მისსავე ნაქირავებ ბინაში, ფიზიკური დაზიანებები მიაყენა, რის შედეგადაც ქალი ადგილზე გარდაიცვალა.

სამართალდამცველებმა, ჩატარებული ოპერატიული და საგამოძიებო მოქმედებების შედეგად, ბრალდებული თბილისში დააკავეს.

დამატებით დეტალებს შინაგან საქმეთა სამინისტრო არ ავრცელებს. მედიაში გავრცელებული ინფორმაციის თანახმად, ქალის ცხედარი ვაჟა-ფშაველას გამზირზე მდებარე ბინაში იქნა აღმოჩენილი. დაკავებულს აღკვეთის ღონისძიების სახით უკვე შეფარდებული აქვს პატიმრობა. გამოძიება საქართველოს სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს და 15 წლამდე პატიმრობას ითვალისწინებს.

მიმდინარე წლის პირველ რვა თვეში, საქართველოში 13 ქალია მოკლული. ფემიციდის სტატუსტიკური მონაცემები სექტემბრის დასაწყისში გამოაქვეყნა გენერალურმა პროკურატურამ. გენერალური პროკურატურის მიერ გამოქვეყნებული მონაცემების შემდეგ, საქართველოში კიდევ 2 ქალი მოკლეს. 2014 – 2022 წლებში საქართველოში 186 ქალია მოკლული.