თბილისში კახა კალაძის ერთ-ერთი კონკურენტი ზურა მახარაძე იქნება

„ჩვენ გვინდა „ნაცების“ და „ქოცების“ ვითომ კონფლიქტის მაგივრად რეალურ პრობლემებზე ვკონცენტრირდეთ. შევცვალოთ ქართული პოლიტიკური რეალობა“, – ამბობს ზურა მახარაძე პარტიის ფეისბუკგვერდზე გავრცელებულ ვიდეომიმართვაში.

მომდევნო თვითმმართველობის არჩევნებში მონაწილეობის სურვილი 17-მა პარტიამ გამოთქვა. ორ დიდ ოპოზიციურ პარტიაში „ლელო – ძლიერ საქართველოსა“ და „გახარია საქართველოსთვის“, ჯერ მერობის კანდიდატები არ დაუსახელებიათ.

• სოციალურ ქსელში გავრცელდა ცნობა, რომ „ლელო“ ამ არჩევნებში თბილისის მერობის კანდიდატად მომღერალ მერაბ სეფაშვილს განიხილავს. ამ საკითხზე დასმული კითხვის პასუხად პარტიაში რადიო თავისუფლებას უთხრეს, რომ ისინი ატარებენ საზოგადოებრივი აზრის კვლევას, სხვადასხვა ადამიანების შესახებ, მერობის კანდიდატს კი რამდენიმე დღეში, ამ კვლევის დასრულების შემდეგ დაასახელებენ;
• პარტიამ „გახარია – საქართველოსთვის“ თბილისის მერობის ერთ-ერთ კანდიდატად გუნდის წევრი, თბილისის საკრებულოს ყოფილი დეპუტატი გიორგი შარაშიძე დაასახელა. პარტიის პრესსამსახურში რადიო თავისუფლებას უთხრეს, რომ საბოლოოდ, კანდიდატი „ლელოსთან“ გაფორმებული მემორანდუმის შესაბამისად, მათთან შეთანხმებით დასახელდება.

2025 წლის თვითმმართველობის არჩევნები 4 ოქტომბერს უნდა გაიმართოს. ამ არჩევნებში დიდი ოპოზიციური პარტიებიდან მონაწილეობას აპირებენ „ლელო – ძლიერი საქართველო“ და „გახარია საქართველოსთვის“. მათ ურთიერთთანამშრომლობის მემორანდუმიც გააფორმეს.

ამ არჩევნებში მონაწილეობაზე უარს ამბობენ „კოალიცია ცვლილებისთვის“, „ერთიანობა – ნაციონალური მოძრაობა“, „ფედერალისტები“ და ა.შ.

„ნაციონალურმა მოძრაობამ“ და „კოალიციამ ცვლილებისთვის“ საარჩევნო ნომრები დაკარგეს

მეხუთე პრეზიდენტი, წინააღმდეგობის მოძრაობის ერთ-ერთი ლიდერი სალომე ზურაბიშვილი, არჩევნების თემას „შემოგდებულს“ უწოდებს – რამაც „გახლიჩა ოპოზიცია და დაასუსტა პროტესტი“.

რადიო თავისუფლება