საქართველოს რკინიგზა ქვიშხეთი-ხაშურის 3-კილომეტრიან მონაკვეთზე ახალ ლიანდაგს აგებს – ამის შესახებ რკინიგზის მიერ გამოქვეყნებულ ინფორმაციაში არის აღნიშნული. სამუშაოები დღეს რკინიგზის გენერალურმა დირექტორმა, ლაშა აბაშიძემ დაათვალიერა, რომლის განცხადებითაც სამუშაოების დასრულების შემდეგ რკინიგზა ამ მონაკვეთზე მოძრაობის სიჩქარეს 100 კმ/სთ-მდე გაზრდის, რაც როგორც სატვირთო, ასევე სამგზავრო მატარებლებს შეეხება. სამუშაოები ზაფხულის სეზონამდე უნდა დასრულდეს. ობიექტზე 200-მდე თანამშრომელი და მძიმე ტექნიკა მუშაობს.
“ზაფხულის სეზონისთვის როგორც დაანონსებული იყო თბილისიდან ბათუმამდე მგზავრობის დრო შემცირდება. საქართველოს რკინიგზის გენერალური დირექტორის ლაშა აბაშიძის განცხადებით, ინფრასტრუქტურული გაჯანსაღება საქართველოს რკინიგზაში მთელი ქვეყნის მასშტაბით აქტიურად მიმდინარეობს, რაც ერთის მხრივ ხელს შეუწყობს მატარებლების სიჩქარის მატებას, მეორეს მხრივ კი მგზავრებისთვის მეტი კომფორტის შექმნას,”- ნათქვამია რკინიგზის მიერ გამოქვეყნებულ ინფორმაციაში.
ხაშური-ქვიშხეთის მონაკვეთი უკავშირდება ქვიშხეთი-ხარაგაული-ზესტაფონის ახალ მონაკვეთს, რომელიც 2025 წლის დეკემბერში გაიხსნა. პროექტი 270 მილიონ დოლარზე მეტი დაჯდა და მის ფარგლებში გაიჭრა ახალი გვირაბები, რომელთა შორისაც ყველაზე გრძელი 8.3 კილომეტრის სიგრძისაა. ახალი მაგისტრალი სატვირთო მატარებლებს უკვე ატარებს.
Loading ...