თამარ გაბუნია – რამდენიმე დღეში „ასტრაზენეკას“ დაპირებული ვაქცინები შემოვა – ჯერჯერობით საკმარისი დოზა გვაქვს, რათა 10-12 კვირის ეპიზოდზე ყველა აიცრას

დამაიმედებელი ინფორმაცია გვაქვს „იუნისეფიდან“, რომ მომდევნო რამდენიმე დღეში დაპირებული ვაქცინები ქვეყანაში შემოვა,- ამის შესახებ ჯანდაცვის მინისტრის მოადგილე თამარ გაბუნიამ ჟურნალისტებთან განაცხადა.

როგორც მან აღნიშნა, ჯერჯერობით საკმარისი ვაქცინაა იმისათვის, რომ 10-12-კვირიანი ინტერვალით ადამიანები მეორე დოზით აიცრან.

„ასტრაზენეკაზე ვაქცინაცია 10-დან 12 კვირამდე შესაძლებელია ყველგან. რეგიონში შესაძლოა საჭირო გახდეს რამდენიმე ადამიანის თავმოყრა ერთად, რომ თავიდან ავიცილოთ დანაკარგი. 10 ადამიანი თუ არ შეგროვდა ვაქცინაციისთის, ეს იქნება ვაქცინის არაეფექტური გამოყენება, ამდენად ასეთი დეფიციტური გამოყენების პირობებში ამას ვერიდებით. რაც შეეხება შემოტანის თარიღს, დამაიმედებელი ინფორმაცია გვაქვს „იუნისეფიდან“, რომ მომდევნო რამდენიმე დღეში ის დაპირებული ვაქცინები ქვეყანაში შემოვა. ჯერჯერობით საკმარისი დოზა გვაქვს იმისათვის, რომ 10-12 კვირის ეპიზოდზე ყველა აიცრას, ასევე იცრებიან ის პირებიც, ვინც გადაუდებელი საჭიროების გამო, მოგზაურობისთვის ჰქონდათ უკვე ბილეთები აღებული“, – განაცხადა გაბუნიამ.