![](https://guria.tv/wp-content/uploads/2021/10/1598873184-1591189010-1580980587-მამუკა-მდინარაძე.jpg)
მამუკა მდინარაძე პრეზიდენტს დოკუმენტის გაყალბებაში ადანაშაულებს.
საუბარია აზერბაიჯანისთვის გაგზავნილ მისალოც წერილზე. მამუკა მდინარაძე ამტკიცებს, რომ პრეზიდენტის ხელმოწერილი დოკუმენტი მას შემდეგ გააყალბეს, რაც აღნიშნულ თემაზე “ოცნების” ლიდერებმა განცხადებები აკეთეს.
„დადასტურებული ფაქტია, რომ როდესაც პრეზიდენტის ადმინისტრაცია ეუბნება ჟურნალისტებს, რომ ჯერ აზერბაიჯანის ცესკოს არ დაუდასტურებია და ამიტომ არ ულოცავდა სალომე ზურაბიშვილი, შემდეგ კი ადმინისტრაცია ამბობს, რომ უკვე მიულოცა, ე.ი. ტყუილია. ეს ეჭვი კი არ არის, ტყუილია. მას შემდეგ, რაც კამპანია აიწია წარმოუდგენელ ფაქტზე, რომ მან მეგობარი, მეზობელი, პარტნიორი ქვეყნის პრეზიდენტს არ მიულოცა, ამის შემდეგ გააყალბეს დოკუმენტი და დააწერეს ძველი რიცხვი. ამას ადასტურებს ორი ფაქტი: ვებგვერდზე აიტვირთა მხოლოდ გუშინ, მას შემდეგ, რაც ამ პიარის შემდეგ გააგზავნეს რეალურად და ჟურნალისტებისადმი გაგზავნილი წერილიც ადასტურებს, რომ მათ სპეციალურად თქვეს ტყუილი ან რაღაც სცენას დგამენ და ესეც გამოჩნდება შემდეგში. ჩვენ ყველა ჯერზე ვაიძულებთ ასეთ ხალხს, რომ საქართველოსთვის იმუშაონ“, – აღნიშნა მდინარაძემ.
ცნობისვის, გუშინ ვიცე-პრემიერებმა ერთმანეთის მიყოლებით სალომე ზურაბიშვილი საქართველოს ეროვნული ინტერესების ღალატში დაადანაშაულეს. ამტკიცებდნენ, რომ პრეზიდენტს ილჰამ ალიევისთვის არჩევნებში გამარჯვება არ მიულოცავს, თუმცა აგორებული სკანდალი მთავრობას ორ საათში შეუტრიალდა, მას შემდეგ რაც პრეზიდენტმა ჯერ კიდევ 9 თებერვლით დათარიღებული მილოცვის წერილი გაასაჯაროვა.