ზაზა დამენიას ქუჩის მოსახლეობა ადგილობრივი ხელისუფლებისგან დაპირებების შესრულებას მოითხოვს

ოზურგეთში ზაზა დამენიას ქუჩაზე საპროტესტო აქცია გაიმართა. მოსახლეობა მრავალწლიან ინფრასტრუქტურულ პრობლემებს აპროტესტებს. ადგილობრივების თქმით, ეროვნული გმირის სახელობის ქუჩაზე არ არის გზა, სანიაღვრე არხები და კანალიზაცია. პრობლემაა ქუჩის დანომვრაც. მოსახლეობის თქმით, ადგილობრივი ხელისუფლება ეროვნული გმირის ზაზა დამენიას საფლავს ყოველწელს ამკობს ყვავილებით, მაგრამ მისი სახელობის ქუჩაზე, სადაც უამრავი ინფრასტრუქტურული პრობლემაა, არანაირი სამუშაო არ ჩაუტარებია. “ყოველ წელს გვპირდებიან, მაგრამ ჯერ არაფერი შეუსრულებიათ. ბავშვები ზაფხულში გზის მტვერს ყლაპავენ, საშინელი გზა გვაქვს. წვიმის დროს კი გავლა შეუძლებელია, იმხელა წყალი დგება ქუჩაში. განცხადებაც დავწერეთ ოზურგეთის მერიაში, მაგრამ ყურადღებას არავინ გვაქცევს.” – აცხადებენ დამენიას ქუჩის მცხოვრებლები. საპროტესტო აქციაზე იმყოფებოდა ეროვნული გმირის ზაზა დამენიას დედაც.