ვინ არის ოზურგეთელი ექთანი, რომელიც ნარკოდანაშაულის ბრალდებით დააკავეს

გურიის პოლიციის დეპარტამენტის თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, ნარკოდანაშაულისთვის 2 პირი დააკავეს. ნარკოტიკული საშუალების უკანონო გასაღების ფაქტზე 1969 წელს დაბადებული ე.ბ., ხოლო ნარკოტიკული საშუალების უკანონო შეძენა-შენახვისთვის, წარსულში ნასამართლევი 1971 წელს დაბადებული ჯ.ბ. დააკავეს. დანაშაულები 20 წლამდე ან უვადო თავისუფლების აღკვეთას ითვალისწინებს. დაკავებული ექთანი ოზურგეთში მცხოვრები ელენა ბონევაა. გამოძიებით დადგინდა, რომ ის ქობულეთში არსებულ შპს „ფსიქიკური ჯანმრთელობისა და ნარკომანიის პრევენციის ცენტრში” მუშაობდა, სადაც ის სამსახურებრივ მდგომარეობას დანაშაულებრივი საქმიანობისთვის იყენებდა და ნარკოტიკულ საშუალებას უკანონოდ ასაღებდა. კერძოდ, ის რეალიზაციის მიზნით, „ფსიქიკური ჯანმრთელობისა და ნარკომანიის პრევენციის ცენტრიდან” მართლსაწინააღმდეგოდ ეტაპობრივად ეუფლებოდა 860 ბენეფიციარისთვის განკუთვნილ ნარკოტიკს, რომელსაც ჯ.ბ.-ზე უკანონოდ ასაღებდა. ელენა ბონევას ოჯახში ამბობენ, რომ მათთვის ეს ყველაფერი დიდი მოულოდნელობაა. ბონევას საქმიანობასთან დაკავშირებით არაფერი იციან და სასამართლოს გადაწყვეტილებას დაელოდებიან. ელენა ბონევას ადვოკატის მერაბ ფუტკარაიას განცხადებით, დაკავებული ბრალს აღიარებს და გამოძიებასთან თანამშრომლობს.