ვინ არის გურიის ახალი გუბერნატორი

სახელმწიფო რწმუნებულის თანამდებობაზე გურიაში, წარმოშობით ოზურგეთელი გიორგი ურუშაძე დაინიშნა. გიორგი ურუშაძის პირველი, ოფიციალური შეხვედრა პრემიერთან დღეს შედგა. ხვალ კი ოფიციალურად მისთვის პირველი სამუშაო დღე იქნება. ის ოზურგეთში სავარაუდოდ, 29 ივნისს ჩამოვა და სამხარეო ადმინისტრაციის თანამშრომლებს შეხვდება.

გიორგი ურუშაძე 1985 წლის 10 დეკემბერს მაშინდელ ქ. მახარაძეში დაიბადა. 1991 წელს შევიდა და 2003 წელს დაასრულა ოზურგეთის N1 საჯარო სკოლა. იმავე წელს ჩაირიცხა საქართველოს ტექნიკურ უნივერსიტეტში, სამართალმცოდნეობის ფაკულტეტზე. ტექნიკურ უნივერსიტეტშივე გაიარა მაგისტრატურის კურსი. გიორგი ურუშაძე წლების განმავლობაში მუშაობდა საქართველოს ფინანსთა სამინისტროში. ბოლო წლებში კი ურუშაძეს ეკონომიკის სამინისტროში წამყვანი თანამდებობები ეკავა. გიორგი ურუშაძეს ჰყავს დედა, ნონა ურუშაძე, რომელიც ოზურგეთის N1 საჯარო სკოლაში გეოგრაფიის პედაგოგია და მამა, ნუგზარ ურუშაძე, რომელიც ოზურგეთის მუნიციპალიტეტის საკრებულოს წინა მოწვევის დებუტატი იყო პარტია ქართული ოცნებიდან. ჰყავს ასევე და თამარ ურუშაძე, რომელიც დაოჯახებულია და მეუღლესთან და ორი შვილთან ერთად თბილისში ცხოვრობს. გურიის ახალი გუბერნატორი დაოჯახებული არ გახლავთ. იგი 36 წლისაა. გუბერნატორობის პერიოდში გიორგი ურუშაძე მშობლიურ სახლში, ქალაქ ოზურგეთში ჯორჯიაშვილის ქუჩაზე იცხოვრებს.

ფოტოზე – გიორგი ურუშაძე (მარცხნივ) ოჯახთან ერთად.