ვინიციაზე სარაკეტო თავდასხმების შედეგად, 23 ადამიანი, მათ შორის სამი ბავშვი დაიღუპა

23 ადამიანამდე გაიზარდა უკრაინის ცენტრალურ ნაწილში მდებარე ქალაქ ვინიცაზე რუსეთის ჯარის მიერ განხორციელებული სარაკეტო თავდასხმის შედეგად. დაღუპულთა შორის სამი ბავშვი იყო. ამის შესახებ უკრაინის საგანგებო სიტუაციების სახელმწიფო სამსახური იტყობინება. პრეზიდენტმა ვოლოდიმირ ზელენსკიმ დარტყმის შემდეგ რუსეთს “მკვლელი” და “ტერორისტული ქვეყანა” უწოდა.

უკრაინის პრეზიდენტის ოფისის უფროსის მოადგილის, კირილო ტიმოშენკოს ინფორმაციით, რუსმა სამხედროებმა ვინიცაზე იერიში მიიტანეს რაკეტებით „კალიბრი“, რომლებიც შავი ზღვის აკვატორიაში მყოფი წყალქვეშა ნავიდან გაუშვეს.

პოლიციის ინფორმაციით, ვინიცის ცენტრში დანგრეული ან დაზიანებულია საოფისე შენობა, საცხოვრებელი სახლები, სამედიცინო ცენტრი და ოფიცერთა სახლი. დაშავდა 90-მდე ადამიანი.

რუსული მხარე ირწმუნება, რომ სარაკეტო დარტყმა ოფიცერთა სახლზე განხორციელდა, რადგან იქ უკრაინის შეიარაღებული ძალების მებრძოლებს ამზადებდნენ. ამის შესახებ გაეროში რუსეთის მუდმივი მისიის უფროსმა მრჩეველმა ევგენი ვარგანოვმა განაცხადა. ის გახდა რუსეთის ხელისუფლების პირველი წარმომადგენელი, რომელმაც ვინიცაზე თავდასხმის შესახებ კომენტარი გააკეთა.