ვიდეო – ”ფურთხი მომხვდა სახეში”, ”ქალი ხარ თუ ვინ ხარ” – დაპირისპირება ოზურგეთის საკრებულოს სხდომაზე

ოზურგეთის საკრებულო ამჯერადაც ურთიერთდაპირისპირებით დაიწყო. მრავალმხრივი კონფლიქტის ერთ–ერთი ნაწილი იყო ოზურგეთის საბავშვო ბაღებში არსებული მდგომარეობა. ”ნაციონალური მოძრაობის” წევრმა თათია ნიკოლაშვილმა ამ თემასთან დაკავშირებით სხდომის დაწყებამდე ბრიფინგი გამართა და სოფლებში მერიაში, გურიანთასა და კონჭკათში არსებულ საბავშვო ბაღებში შექმნილ მძიმე ინფრასტრუქტურულ პრობლემებზე ისაუბრა. აღნიშნულთან დაკავშირებით, ოზურგეთის მერის მოადგილემ გიორგი ღურჯუმელიძემ განაცხადა, რომ ოპოზიცია კვლავ პროვოკაციებითაა დაკავებული, რადგან მიმდინარე წელს ოზურგეთის არაერთი საბავშვო ბაღისთვის ახალი შენობის მშენებლობა დაიწყება.

ამ თემას მოჰყვა კონფლიქტი უმრავლესობის წევრ მარი ჩხიკვიშვილსა და ოპოზიციონერ თათია ნიკოლაშვილს შორის. ჩხიკვიშვილი ნიკოლაშვილს იმ ტრიბუნასთან მიახლოების საშუალებას არ აძლევდა, სადაც გიორგი ღუჯუმელიძე განცხადებას აკეთებდა. ამ დროს დეპუტატებმა ერთმანეთს არაერთი შეურაცხმყოფელი ფრაზით მიმართეს.