ვიდეო -“კბილის ჩხირების საკვებად გამოყენება არ არის უსაფრთხო, გთხოვთ არ შეჭამოთ“ – სამხრეთ კორეის მთავრობის მიმართვა ხალხს

სამხრეთ კორეის საკვებისა და მედიკამენტების უსაფრთხოების სამინისტრომ მოსახლეობას მოუწოდა, რომ სახამებლისგან დამზადებული შემწვარი კბილის ჩხირები აღარ შეჭამონ. სოციალურ ქსელებში ვირუსულად გავრცელდა ვიდეოები, რომლებშიც სახამებლისგან დამზადებულ კბილის ჩხირებს სხვადასხვა სანელებელთან ერთად ჭამენ.

„არ არის დადასტურებული, რომ კბილის ჩხირების საკვებად გამოყენება უსაფრთხოა. გთხოვთ, არ შეჭამოთ“,- წერს სამხრეთ კორეის საკვებისა და მედიკამენტების უსაფრთხოების სამინისტრო.

სამხრეთ კორეაში კარტოფილის ან სიმინდის სახამებლისგან დამზადებულ კბილის ჩხირებს საღებავსაც უმატებენ, რათა მწვანე ფერი ჰქონდეს. გავრცელებულ ვიდეოებში კი კბილის ჩხირებს, რომელიც რეალურად სანიტარული პროდუქტია, ზეთში ავლებენ და წვავენ.

სამხრეთ კორეაში ე.წ. მუკბანგის ვიდეოები ძალიან პოპულარულია. ასეთ ვიდეოებში ადამიანები დიდი რაოდენობით საკვებს ჭამენ, ან უჩვეულო კერძებს აგემოვნებენ, რასაც ბევრი მაყურებელი ჰყავს. ტიკტოკერის თქმით კი, ასე მომზადებული კბილის ჩხირები „ძალიან ხრაშუნაა”.