“რიონის ხეობის” მცველი, ვარლამ გოლეთიანი ჭყონდიდის ეპარქიაში, სალხინოში ჩავიდა.
მასთან ერთად არიან ნამავანჰესის აშენების წინააღმდეგ აქციების სხვა ლიდერებიც.
როგორც გოლეთიანმა თქვა, ის მხარეებად არავის ყოფს და უნდა, რომ ეპარქიაში ცხოვრება მშვიდობიანად გაგრძელდეს.
“ჩვენ თვალს ვადევნებთ ეპარქიაში განვითარებულ მოვლენებს. ვწუხვართ ამ ყველაფრის გამო და ჩამოვედით, რომ ეპარქიაში ცხოვრების მშვიდობიანად გაგრძელებას დავუჭიროთ მხარი. ეს არის ჩვენი აქ მოსვლის მიზანი”. – თქვა მან.
მანამდე, ჭყონდიდის ეპარქიაში, სალხინოს ეკლესიის ეზოში მოქალაქეები ერთმანეთს ფიზიკურად დაუპირისპირდნენ.
ეკლესიის ეზოში ბზობის დღესასწაულზე შეიკრიბნენ როგორც მიტროპოლიტი სტეფანეს მხარდამჭერები, ისე მასთან დაპირისპირებული სასულიერო პირები და მრევლი როგორც ჭყონდიდის, ისე სხვა ეპარქიებიდან.
პირველი დაპირისპირება ადგილობრივი ბიზნესმენის, კლიმენტი კეკუტიას გამოჩენას მოჰყვა, რომელიც ყოფილ ჭყონდიდელ მიტროპოლიტს, პეტრე ცაავას ღიად უპირისპირდება და როგორც სხვა სასულიერო პირები ამბობენ, 22 აპრილს მას უშვერი სიტყვებითაც აგინებდა. პეტრე ცაავას მხარდამჭერი მღვდლები, რომელთა ნაწილსაც მიტროპოლიტმა სტეფანემ მღვდელმსახურების უფლება შეუჩერა, ამბობენ, რომ კლიმენტი კეკუტიას არ აქვს უფლება, ეკლესიაში მივიდეს.
შემდეგ კი დაძაბულობა სალხინოს ეკლესიის ეზოში თავად მიტროპოლიტ სტეფანეს გამოჩენას მოჰყვა.
პეტრე ცაავას მხარდამჭერი სასულიერო პირები მასაც არ აძლევდნენ ტაძარში შესვლის უფლებას, თუმცა, პოლიციის დახმარებით, მიტროპოლიტმა ეკლესიაში შესვლა შეძლო.