კოალიცია ცვლილებისთვის ეუთო-ს 24 ქვეყნის მიერ “მოსკოვის მექანიზმის” ამოქმედებას გამოეხმაურა. განცხადება მათმა ერთ-ერთმა ლიდერმა, ზურა ჯაფარიძემ გააკეთა.
“მოსკოვის მექანიზმის ამუშავება მკაფიო გზავნილია იმასთან დაკავშირებით, რომ საქართველოში ადამიანის უფლებების დარღვევა ცალკეული შემთხვევები არაა და ამას სისტემური ხასიათი აქვს. ასევე, ეს გზავნილია იმაზე, რომ საერთაშორისო თანამეგობრობის თვალთახედვით, საქართველოში შიდა სამართლებრივი ინსტიტუციური მექანიზმები აღარ არსებობს იმისთვის, რომ ქვეყანაში დამოუკიდებელი და სანდო გამოძიება ჩატარდეს.
ეს ეუთო-ს ერთ-ერთი ყველაზე მკაცრი მექანიზმი და ინსტრუმენტია, რომელიც ქვეყნებში გამოიყენება ადამიანის უფლებების ფართომასშტაბიანი და მძიმე დარღვევების შემთხვევებში, როცა სახელმწიფოს მხრიდან პასუხისმგებლობის აღების ან გამოძიების ჩატარების ნება-სურვილი არ ჩანს […] ეუთო-ს ამ მექანიზმის ანგარიშს შემდგომში იყენებს თავად ეუთო, ევროსაბჭო და ევროკავშირის სხვადასხვა ინსტიტუტი – მათ შორის, ეს საფუძველი ხდება შეზღუდვებისთვის, სანქციების დაწესებისა და პოლიტიკური გადაწყვეტილებებისთვის […] ამ პროცესს ქართული ოცნების რეჟიმისთვის გრძელვადიანი და მძიმე შედეგები ექნება”. – თქვა ჯაფარიძემ კოალიციის ოფისში გამართულ ბრიფინგზე.
ეუთო-ს 24-მა ქვეყანამ საქართველოში ადამიანის უფლებების გაუარესებული მდგომარეობის შესასწავლად მოსკოვის მექანიზმი აამოქმედა. მექანიზმის ფარგლებში საქართველოში არსებული მდგომარეობის შესასწავლად ექსპერტების მისია ჩამოვა.
Loading ...