”ეს არის საბოტაჟი…სტიქიის სალიკვიდაციო თანხებს მიზანმიმართულად არ გვაძლევენ” – რაში ადანაშაულებს კოტე შარაშენიძე ხელისუფლებას

ოზურგეთის მოქმედი მერი და ამავდროულად მერობის დამოუკიდებელი კანდიდატი კოტე შარაშენიძე ხელისუფლებას მის წინააღმდეგ მიზანმიმართულ ქმედებაში ადანაშაულებს. შარაშენიძის თქმით, მერიამ სამხარეო ადმინისტრაციას ცენტრალურ ხელისუფლებასთან შუამდგომლობით მიმართა და სტიქიის სალიკვიდაციო ფონდიდან თანხები მოითხოვა, თუმცა მიუხედავად იმისა, რომ წერილი შესაბამის უწყებას ორჯერ გაეგზავნა, მასზე რეაგირება ამ დრომდე არ მომხდარა. შარაშენიძეს თქმით თანხების ჩარიცხვა სპეციალურად არ განხორციელდა.  რათა ამით მოქმედი მერის მიმართ მოსახლეობაში უკმაყოფილება გაჩნდეს.  სამხარეო ადმინისტრაციაში ამ თემასთან დაკავშირებით განმარტებებს არ აკეთებენ.

”იმ სტიქიის შედეგების სალიკვიდაციოდ, რომელიც სექტემბრის თვეში მოხდა, საორიენტაციო თანხების  მობილიზებისთვის  თვეზე მეტია წერილი გვაქვს გურიის სამხარეო ადმინისტრაციაში გაგზავნილი,  მაგრამ მათ დღემდე ინფრასტრუქტურის სამინისტროში არ გადაუგზავნიათ  ეს წერილი. გავგზავნეთ მეორე წერილიც, მაგრამ აჩერებენ. ამასობაში კი სტიქიის შედეგად ხალხს სახლამდე  მისასვლელი გზები წართმეული აქვს, სავალი ნაწილი დაიშალა, მეწყრული პროცესები დაწყებულია. ამ დროს კი გუბერნიას ყველაფერი იმიტომ აქვს შეჩერებული, რომ ოღონდ მუნიციპალიტეტს თანხები არ ჰქონდეს, რომ მოქმედმა მერმა სამუშაოები არ შეასრულოს და ნაკისრი ვალდებულებებისთვის ფული არ ჰქონდეს, ეს ხდება  ხალხის დასანახად, მათზე გავლენის მოსახდენად. ეს არის ჩვეილებრივი საბოტაჟი. ასევე, არის ფაქტები, რომ ორ კვირაზე მეტია ოზურგეთის მერიაში ინფრასტურქტურული პროექტებისთვის ხაზინის მიერ არცერთი ტრანზაქცია არ შესრულებულა  ამ ყველაფერს გურიის გუბერნია აფერხებს. მუნიციპალიტეტი ამ დროს პარალიზებულია.  ასევე, ”სოფლის მხარდამჭერი პროგრამის” ფარგლებში ვერ ვანაზრაურებთ მეწარმეთა შესრულებულ სამუშაოებს, ადამიანებს ვერ ვაძლევთ ხელფგასს, რომელიც ეკუთვნით. რადგან გუბერნია აფერხებს.  გურიის სამხარეო ადმინისტრაცია და ოზურგეთის საკრებულო გადართულები არიან საარჩევნო რეჟიმში და მიზანმიმართულად უშლიან ხელს მოქალაქეთა პრობლემების მოგვარებას.” – აცხადებს კოტე შარაშენიძე.