ერთიანი ეროვნული გამოცდების რეგისტრაციის ძირითადი ეტაპი დასრულდა

ერთიანი ეროვნული გამოცდებისათვის  რეგისტრაციის პროცესი წელსაც რამდენიმე ეტაპად ტარდება. რეგისტრაციის ძირითადი ეტაპი უკვე დასრულდა. აბიტურიენტებს, სურვილის შემთხვევაში, საგამოცდო საგნის წაშლა ან დამატება, ასევე გამოცდის ენის შეცვლა 14 აპრილის 18:00 საათამდე შეეძლებათ. საგანმანათლებლო პროგრამების ჩამონათვალში ცვლილებების შეტანის შესაძლებლობა კი აბიტურიენტებს აპელაციის შედეგების გამოქვეყნებიდან მომდევნო დღის ჩათვლით აქვთ.

გამოსაცდელებს, რომლებსაც საგამოცდო ცენტრებში ესაჭიროებათ სპეციფიკური გარემოს შექმნა და რეგისტრაციის ძირითადი ეტაპის დროს უკვე მონიშნეს ველი „სპეციალური პირობები“, შეფასებისა და გამოცდების ეროვნულ ცენტრში 14 აპრილის 18:00 საათამდე უნდა წარმოადგინონ შესაბამისი ჯანმრთელობის ცნობა (ფორმა N100).

2022 წლის ერთიანი ეროვნული გამოცდებისათვის რეგისტრაციის ძირითადი ეტაპი 1 მარტს 10:00 საათზე დაიწყო და 4 აპრილის 18:00 საათზე დასრულდა.  ამ ვადის განმავლობაში რეგისტრაცია 41 ათასზე მეტმა აბიტურიენტმა გაიარა.

კომენტარები