თურქეთის პრეზიდენტმა რეჯეფ თაიფ ერდოღანმა განაცხადა, რომ პალესტინის ტერიტორიებზე და ლიბანში ისრაელის სამხედრო ოპერაციები შესაძლოა, მალე თურქეთშიც გავრცელდეს. ამის შესახებ ერდოღანმა 1-ელ ოქტომბერს პარლამენტის გახსნაზე სიტყვით გამოსვლისას განაცხადა.
ერდოღანმა აღნიშნა, რომ ისრაელის ქმედებები შესაძლოა რეგიონის სხვა ქვეყნებშიც გავრცელდეს და საბოლოოდ თურქეთამდეც მიაღწიოს.
„ლიბანის შემდეგ შემდეგი ადგილი, რომელსაც [ისრაელი] თვალს დაადგამს, გარკვევით გეუბნებით, იქნება ჩვენი სამშობლო. [ისრაელის პრემიერ-მინისტრი ბენიამინ] ნეთანიაჰუს ოცნებებში შედის ანატოლია. რაც არ უნდა დაჯდეს, თურქეთი ისრაელის წინააღმდეგ ბრძოლას გააგრძელებს და მსოფლიოს ამ კეთილშობილური პოზიციისკენ მოუწოდებს. თურქეთი ყველაფერს გააკეთებს იმისათვის, რომ შექმნას კაცობრიობის ფრონტი“, – აღნიშნა ერდოღანმა.
ერდოღანმა ასევე გააკრიტიკა ისინი, ვინც ესკალაციის ფონზე თურქეთის ნეიტრალიტეტის შენარჩუნებას მხარს უჭერს.
„ჩვენ ვდგავართ საოკუპაციო ქსელის წინაშე, რომელიც აპირებს მთელი რეგიონის ცეცხლში ჩაძირვას. არავინ, ვისაც სინდისი აქვს, არ შეიძლება გაჩუმდეს მასობრივი მკვლელობების ამ ქსელის წინაშე. როგორც ჰიტლერი გააჩერეს, როდესაც მან საკუთარი თავი გამადიდებელი შუშით დაინახა, ასევე გააჩერებენ ნეთანიაჰუსაც“, – განაცხადა თურქეთის პრეზიდენტმა.
შეგახსენებთ, ირანმა ისრაელს 1-ელ ოქტომბერს რაკეტებით შეუტია. ისრაელის სამხედროები აცხადებენ, ირანმა 180-მდე რაკეტა გაისროლა, რომელთა უმეტესობა ჩამოაგდეს.
ისრაელის პრემიერ-მინისტრმა ბენიამინ ნეთანიაჰუმ თავდასხმას „დიდი შეცდომა“ უწოდა და პირობა დადო, რომ ირანი პასუხს აგებს.
Loading ...
