ეკატერინე ტიკარაძე – მეოთხე ტალღა არის დაღმავალი, შემდგომი დღეების განმავლობაში ინფექციის გავრცელების კლება იქნება

საქართველოს ჯანდაცვის მინისტრის ეკატერინე ტიკარაძის განცხადებით, ქვეყანაში ამ ეტაპზე ჯერ კიდევ კორონავირუსის მეოთხე ტალღაა. მისივე თქმით,  ინფექციის გავრცელების კოეფიციენტებზე დაკვირვებამ აჩვენა, რომ უახლოეს მომავალში ვირუსის ახალი შემთხვევების კლება დაიწყება.

„პირველ რიგში, აუცილებლად უნდა აღვნიშნოთ, რომ არანაირი საქმე არ გვაქვს მეხუთე ტალღასთან, ეს არის გარკვეული პროცესი მეოთხე ტალღის, რომელიც ჯერჯერობით არ დასრულებულა. აქედან გამომდინარე, მნიშვნელოვანია სწორი აქცენტების დაცვა. რაც შეეხება თვითონ ტალღის მიმართულებას, აღმავალია თუ დაღმავალი, ცალსახად შეგვიძლია ვთქვათ, რომ ტალღა არის დაღმავალი, ვინაიდან ჩვენ ვაკვირდებით ინფექციის გავრცელების კოეფიციენტის ე.წ. ერტეს შემცირებას, რაც მიუთითებს, რომ შემდგომი დღეების განმავლობაში აბსოლუტურ რიცხვებში ინფექციის კლება იქნება“, – განაცხადა ეკატერინე ტიკარაძემ.

ამასთან, ტიკარაძე ამბობს, რომ პაციენტების ნაკადების სამართავად ჰოსპიტალურ სექტორში საკმარისი რესურსია.

„რაც შეეხება რესურსებს, ამ ეტაპისთვის საკმარისი რესურსი გვაქვს, თუ გართულდა სიტუაცია, რა თქმა უნდა, არსებობს ალტერნატიული გზები, როგორც ერთხელ გამოვიყენეთ საველე ჰოსპიტალი. თუმცა დღეს საველე ჰოსპიტალის საწიროება არ დგას“, – განაცხადა ეკატერინე ტიკარაძემ.