რადიო თავისუფლების ცნობით, ევროკავშირის ტექნიკური მისია, რომელიც 26 ოქტომბრის საპარლამენტო არჩევნებში გამოვლენილ დარღვევებს შეისწავლის, საქართველოში უახლოეს კვირებში ჩამოვა. ამის შესახებ გამოცემას ევროკომისიის პრესსპიკერმა საგარეო ურთიერთობათა საკითხებში, პიტერ სტანომ უთხრა.
“საამისოდ მზადება მიმდინარეობს. მისიის შესახებ უფრო მეტი დეტალი შესაფერის დროს გახდება ცნობილი”. – რადიო თავისუფლების ცნობით, გამოცემას წერილობით უპასუხა სტანომ.
როგორც რადიო თავისუფლება ასევე წერს, სტანოს თქმით, ევროკავშირის წევრი ქვეყნების წინაშე მოხსენებით ეუთო/ოდირის სადამკვირვებლო მისიის ხელმძღვანელი წარდგება, რომელიც ისაუბრებს, თუ როგორ უპასუხეს საჩივრებს საარჩევნო დარღვევებზე.
ცნობისთვის, 18 ნოემბერს ევროკავშირის საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჯოზეფ ბორელმა პრესბრიფინგზე განაცხადა, რომ საქართველოში ჩამოვიდოდა ტექნიკური მისია, რომლის მიზანია, “ადგილზე გაანალიზოს სიტუაცია და შეაფასოს, თუ რა მოხდა [26 ოქტომბრის] არჩევნებზე, რომლის სამართლიანობაც ეჭვქვეშ დგას”.
“არჩევნების შედეგებმა ევროპაში დიდი შეშფოთება გამოიწვია უკუსვლის გამო და ადგილზე ვითარება შესასწავლია, გასაანალიზებელია, ტექნიკური მისიის ამოცანა სწორედ ეს არის. სადამკვირვებლო მისიის ხელმძღვანელი უკვე მოვიწვიეთ, მასზე უკეთ ვერავინ იტყვის რა მოხდა ადგილზე.
ქართველი ხალხის დემოკრატიული მოთხოვნები უნდა დაკმაყოფილდეს და ყველა გარემოებას ნათელი უნდა მოეფინოს, მაგრამ მისიის შედეგს წინასწარ ვერ გეტყვით”. – თქვა ბორელმა.
ცნობები იმის შესახებ, რომ საქართველოში ევროკავშირი ევროკომისიის ოფიციალური პირებისგან შემდგარ ტექნიკურ მისიას გამოგზავნიდა, თავდაპირველად სოციალურ ქსელში რადიო თავისუფლების ევროპული ბიუროს უფროსმა რიკარდ იოზვიაკმა გაავრცელა.
ამჟამად უნგრეთი ევროკავშირის ერთადერთი წევრი ქვეყანაა, რომელმაც საქართველოს 2024 წლის საპარლამენტო არჩევნებში ქართულ ოცნებას გამარჯვება მიულოცა.
Loading ...
