დავით სარალიძის მკვლელობისთვის მსჯავრდებულმა, პრეზიდენტს შეწყალების თხოვნით მიმართა

მიხეილ კალანდიამ  სალომე ზურაბიშვილს შეწყალების თხოვნით მიმართა. ინფორმაციას  „ინტერპრესნიუსი” ავრცელებს.

მსჯავრდებულის ადვოკატი, ზურაბ თოდუა ამბობს, რომ მიხეილ კალანდიას მიმართ ქართულმა სასამართლოებმა პოლიტიკური ძალების ზეგავლენის შედეგად გამოიტანეს გამამტყუნებელი განაჩენი, შესაბამისად, პრეზიდენტმა ის უნდა შეიწყალოს.

უმძიმესი დანაშაული დედაქალაქის ცენტრში, 2017 წლის 1 დეკემბერს მოხდა.  ხორავას ქუჩაზე მოზარდებს შორის მომხდარი ჩხუბის დროს, არასრულწლოვან დავით სარალიძე და ლევან დადუნაშვილი სასიკვდილოდ დაჭრეს.

2 წლიანი საპროტესტო აქციების შემდეგ, 2019 წლის 3 ივნისს, თბილისის სააპელაციო სასამართლომ  გიორგი ჯანაშია გაამტყუნა და დაადგინა, რომ მან დავით სარალიძის მკვლელობა ჩაიდინა ჯგუფურად, სხვა პირთან ერთად. გიორგი ჯანაშიას 11 წლით და 3 თვით პატიმრობა მიესაჯა.

ლევან დადუნაშვილის მკვლელობისთვის მსჯავრდებულ გუგა ბარბაქაძეს სააპელაციო სასამართლომ საქალაქო სასამართლოს მიერ გამოტანილი სასჯელი, 10 წლით და 6 თვით პატიმრობა დაუმძიმა და 11 წლით და 3 თვით თავისუფლების აღკვეთა მიუსაჯა.

სააპელაციო სასამართლოს გადაწყვეტილებიდან მეორე დღეს, სამართალდამცავებმა დავით სარალიძის მკვლელობის ბრალდებით მიხეილ კალანდია დააკავეს , რომელსაც მანამდე მოწმის სტატუსი ჰქონდა.

2020 წლის 25 თებერვალს, თბილისის საქალაქო სასამართლომ მიხეილ კალანდია დამნაშავედ ცნო დავით სარალიძის განზრახ ჯგუფურად მკვლელობაში და 15 წლით თავისუფლების აღკვეთა მიუსაჯა, თუმცა, არასრულწლოვანთა მართლმსაჯულების კოდექსის თანახმად, სასჯელი ერთი მესამედით შეუმცირა და საბოლოოდ, საპატიმრო სასჯელად განუსაზღვრა 11 წელი და 3 თვე.