გურიის რეგიონში ვაქცინაცია ორშაბათიდან დაიწყება – არჩილ მჟავია

საქართველოში კორონავირუსის საწინააღმდეგო ვაქცინის პირველი პარტია შემოვიდა.ვაქცინაციის პროცესი პირველ ეტაპზე 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

თბილისში 10 ამცრელი ცენტრი იქნება, რეგიონებში კი ასე გადანაწილდა:

• ქუთაისში – 4
• ბათუში – 4
• რუსთავში – 2
• ზუგდიდში – 2
• რეგიონულ ცენტრებში – თითო.

რაც შეეხება გურიის რეგიონს, ვაქცინის პარტია ოზურგეთში დღეს ჩამოვა, თუმცა უშუალოდ კლინიკაში შეტანა და ვაქცინაციის პროცესი ორშაბათიდან დაიწყება. როგორც დაავადებათა კონტროლის ეროვნული ცენტრის გურიის წარმომადგენლობის ხელმძღვანელი არჩილ მჟავია ”გურიაTV”-თან ამბობს, საერთო გეგმის მიხედვით, პირველ რიგში სამედიცინო დაწესებულებებში მომუშავე ადამიანები აიცრებიან. ასეთი კი ოზურგეთში დაახლოებით 600, ლანჩუთში – 300 -მდე, ხოლო ჩოხატაურში 200 ადამიანია.

‘‘ვაქცინას დაავადებათა კონტროლის ეროვნული ცენტრის გურიის წარმომადგენლობა გურიაში დღეს ჩამოიტანს. თუმცა უშუალოდ ვაქცინაციის პროცესი ორშაბათიდან დაიწყება. აცრები ორშაბათს ოზურგეთის კლინიკა ”მედლაფაში” ჩატარდება. რაც შეეხება ლანჩხუთსა და ჩოხატაურს, ვაქცინაციის პროცესი ორივე ქალაქში, ”მედალფას” კლინიკებში, ოთხშაბათს დაიწყება’‘ – განაცხადა არჩილ მჟავიამ.