გურიაში კორონავირუსის შემთხვევები დაკავშირებულია ფართომასშტაბიან ქორწილთან-ვცხოვრობთ პანდემიის პირობებში, თავი უნდა შევიკავოთ – ამირან გამყრელიძე

გურიაში კორონავირუსის შემთხვევების ნაწილი ფართომასშტაბიან ქორწილს უკავშირდება, – აღნიშნულიას შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ჟურნალისტებთან განაცხადა.

მან საზოგადოებას შეახსენა, რომ 100 ადამიანზე მეტის შეკრება კანონით აკრძალულია და ყველას მოუწოდა, რომ ხალხმრავალი შეკრებებისგან თავი შეიკავონ.

„გურიაში გვაქვს შემთხვევები, სამი გვქონდა გუშინ და დღეს დილას კიდევ ერთი დაემატა. ჩოხატაურის მუნიციპალიტეტის სოფელ ქვენობანში გაფართოებული ეპიდკვლევა დაიწყო. ასევე კვლევები მიმდინარეობს ოზურგეთის რაიონში. მინდა ერთი განცხადება გავაკეთო, ეს შემთხვევები დაკავშირებულია დიდ, ფართომასშტაბიან ქორწილთან. ეს მოწოდება ჩვენ რამდენჯერმე გავაკეთეთ, ვცხოვრობთ მთელ მსოფლიოში პანდემიის და საქართველოში ეპიდემიის პირობებში. აკრძალულია კანონით 100 ადამიანზე მეტის შეკრება, არავითარ შემთხვევაში არ შეიძლება, თავი უნდა შევიკავოთ, ეს არის განსაკუთრებულად მომეტებული რისკი, როცა ბევრი ადამიანი ყოველგვარი დაცვის გარეშე იკრიბება. რაც მეტი ქორწილი იქნება ქვეყანაში, რაც მეტი ბავშვი გაჩნდება, ამას რა სჯობს, მაგრამ დროებით მეგობრებო სანამ ამ პირობებში ვცხოვრობთ, თავი შევიკავოთ ამგვარი შეკრებებისგან, რადგან ეს გახლავთ ერთ-ერთი უმთავრესი მიზეზი ინფექციის შემდგომი გავრცელებისა.

გუშინაც იყო ამ საკითხზე საუბარი შესაბამის წრეებში და ვფიქრობ, რომ ამაზე შესაბამისი რეაქცია იქნება“ , – განაცხადა ამირან გამყრელიძემ.

გურიაში კორონავირუსით დაინფიცირებული ადამიანებიდან რამდენიმე ბათუმში, ფართომასშტაბიან ქოეწილში იმყოფებოდნენ.