გრანდიოზული ბოლო ზარი და საზეიმო განწყობა სოფელ შრომაში – მე-12 კლასელები სკოლას ემშვიდობებიან

ამაღელვებელი და დასამახსოვრებელი ღონისძიებით შრომის საჯარო სკოლის მე-12 კლასელები სკოლას დაემშვიდობნენ. მემორიალს ფერადი წარწერებით აჭრელებული თეთრი პერანგები, უამრავი კეთილი სურვილი და თვალცრემლიანი მასწავლებლები და მშობლები ამშვენებდნენ. ბოლო ზარი ერთდროულად სიხარულთან და ცრემლებთან არის დაკავშირებული. ემშვიდობები მშობლიურ სკოლას, კლასს, მერხს, მასწავლებელს და გული გწყდება. თუმცა, დამოუკიდებელი ცხოვრებისკენ პირველი ნაბიჯების გადადგმაც გიხარია და ყველაზე უმთავრესისთვის – სტუდენტობისთვის ემზადები. ეს ორმაგი ემოცია დღეს ნამდვილად იგრძნობოდა სცენაზე. წარმოდგენილი იყო ქართული და უცხოური ცეკვები, სიმღერები, სახალისო სკეტჩები და სხვა აქტივობები, რითაც კურსდამთავრებულებმა განვლილი 12 წელი შეაჯამეს. მათ მადლობა გადაუხადეს მასწავლებლებს გაწეული შრომისთვის და სიმბოლური საჩუქრები გადასცეს. ღონისძიების ბოლოს სკოლის დირექტორმა, ქალბატონმა რუსუდან ცეცხლაძემ და კლასის დამრიგებელმა, ქალბატონმა ციცო ბაკურაძემ მოსწავლეებს მიულოცეს სკოლის დასრულება და წარმატებები უსურვეს მომავალში.

ავტორი: ახალგაზრდა რეპორტიორი, ავთო ხომერიკი