“ქართული ოცნების” ლიდერებს მოვუწოდებ, საქმის კეთებაში შევეჯიბროთ ერთმანეთს და არა ლანძღვა-გინებაში, არა ცინიზმში, ხალხზე ზრუნვაში შევეჯიბროთ და არა არაფრისმთქმელ საუბარში, – ასე მიმართა “სტრატეგია აღმაშენებლის” ლიდერმა გიორგი ვაშაძემ რუსთაველის გამზირზე მიმდინარე საპროტესტო აქციაზე შეკრებილ მოქალაქეებს.
მისივე თქმით, ყველა ვინ დღეს რუსთაველზე დგას, არის ღირსების მქონე ადამიანი, რომელიც საკუთარი მაგალითით უჩვენებს მთელ საქართველოს, რომ არასდროს არ უნდა შეეგუოს იმ უსამართლობას, რაც დღეს ქვეყანაში ხდება.
“დღეს ხომ ჩვენ მარტივ რაღაცას ვითხოვთ, ვითხოვთ გაყალბებული არჩევნების გაუქმებას. მოდით ერთი სიტყვით ვთქვათ, რაზე უნდა აშენდეს ნებისმიერი ძლიერი სახელმწიფო. სახელმწიფო შეიძლება აშენდეს მხოლოდ და მხოლოდ კანონზე, სამართალზე, კონსტიტუციაზე, დემოკრატიაზე და ამ ყველაფრის პრინციპი არის არჩევნები. ეს არჩევანი მოგვპარეს ჩვენ, წაგვართვეს. ხედავთ მათ ცინიკურ დამოკიდებულებას როცა ტელევიზიით გამოდიან. მაგრამ ჩვენსა და მათ შორის განსხვავება ისაა, რომ ჩვენ მათაც პატივს ვცემთ, ვინც “ქართულ ოცნებას” მისცა ხმა, მაგრამ ვამბობთ, რომ ისინი არ არიან უმრავლესობაში. უმრავლესობა ითხოვს სწორ და სამართლიან არჩევნებს. თქვენ ითხოვთ ამ არჩევნებს ჩვენი ქვეყნისთვის, ჩვენი მომავლისთვის. ჩვენი ბრძოლა არ არის ერთჯერადი, არ არის ერთდღიანი, ეს არის განგრძობადი, მაგრამ მშვიდობიანი პროტესტი. სამწუხაროდ, “ქართულმა ოცნებამ” დაამკვიდრა, რომ მხოლოდ აქედან, ქუჩიდან შეიძლება ვაიძულოთ კონკრეტული სწორი ნაბიჯების გადადგმა, მხოლოდ ხალხის პროტესტის ფონზე ხდება გადაწყვეტილებების მიღება, რადგან მათ მოშალეს პარლამენტი როგორც ინსტიტუცია, სასამართლო, აღმასრულებელი ხელისუფლება და თითოეული მათგანი არის მხოლოდ და მხოლოდ დავალების შემსრულებელი. ეს არ გვინდა ჩვენ. ჩვენ გვინდა ხალხზე ორიენტირებული მმართველობა. ჩვენ გვინდა მმართველობა, რომელიც ხალხს ემსახურება და არამმართველობა, რომელიც ითხოვს თავის მხრივ, ხალხის მსახურს. ამიტომ ვართ ერთად და აუცილებლად გავიმარჯვებთ”, – განაცხადა გიორგი ვაშაძემ.
მისივე თქმით, გუშინ ცესკოსთან ხელისუფლებამ პირდაპირი პროვოკაცია სცადა.
“მათ წყლის ჭავლი რატომ გაუშვეს? ეგონათ რომ პროვოკაციაზე ვიღაცას წამოიკიდებდნენ. ვიღაც აყვებოდა, აგრესიას გამოხატავდა, კანონს დაარღვევდა. ჩვენი ძალა ამაშია, რომ მაინც მშვიდობიან პრტესტს ვაგრძელებთ და ამით გავიმარჯვებთ ჩვენ. მეგობრებო, ქვეყნის აღმშენებლობას ბევრი ენერგია სჭირდება, მაგრამ ის შემობრუნების წერტილი, რომლიდანაც საქმის კეთებას დავიწყებს, ქვეყნის ყოველდღიურ განვითარებაზე ზრუნვას დავიწყებთ დამერწმუნეთ, რომ ძალიან ახლოსაა. ამ სიახლოვეს უნდა ბოლომდე მიყვანა, ერთად დგომა, ერთმანეთის გამხნევება. გავიმარჯვებთ იმიტომ რომ სიმართლე, სიკეთე, სიყვარული აქაა. ჩვენ არ გვინდა დაპირისპირება ქვეყანაში. არ გვინდა ხიდი რომ იყოს ჩატეხილი და ყოფდნენ ადამიანებს ოპოზიციონერებად და პოზიციონირებად, მსახურებად და თავისუფლებისთვის მებრძოლებად. ჩვენ გვინდა ერთიანი საქართველო. მთელი ეს მუხტი მომართული რომ იყოს საქმის საკეთებლად, რამდენ რამეს გავაკებდით?! რამდენად სწრაფად წავიდოდით წინ?! რამდენ ოჯახს გავუმართავდით ხელს?! რამდენი ადამიანი იპოვნიდა საკუთარ ადგილს?! რამდენი ემიგრანტი ჩამოვიდოდა და დაუბრუნდებოდა თავის სამშობლოს?! რამდენ პენსიონერს ექნებოდა ღირსეული ცხოვრება. რამდენი ახალგაზრდა იპოვნიდა საკუთარ ადგილს ქვეყანაში და იტყოდა რომ მეამაყება რომ ჩვემი ქვეყნის შვილი ვარ?! საქმის კეთება გვინდა! “ქართული ოცნების” ლიდერებს მოვუწოდებ საქმის კეთებაში შევეჯიბროთ ერთმანეთს და არა ლანძღვა-გინებაში, არა ცინიზმში, ხალხზე ზრუნვაში შევეჯიბროთ და არა არაფრისმთქმელ საუბარში. ვიკამათოთ, მაგრამ საქმეზე. 8 წელი ჩვენ ვხედავთ უმოქმედობას, ფულის კეთებას და არა ხალხზე ზრუნვას”, – განაცხადა გიორგი ვაშაძემ.
Loading ...