გერმანიის ქალაქ კიოლნში მეორე მსოფლიო ომის დროინდელი სამი ბომბი აღმოაჩინეს

გერმანიის ქალაქ კიოლნში მეორე მსოფლიო ომის დროინდელი ბომბების აღმოჩენის გამო ევაკუაცია გამოცხადდა.

გამოცემა Deutsche Welle-ს ინფორმაციით, დოიცის რაიონში სამი ბომბი აღმოაჩინეს, რომელთაგან ორი 90 კილოგრამს, ხოლო ერთი 45 კილოგრამს იწონის.

საფრთხის გამო კიოლნში 20 000 ადამიანს საცხოვრებლის დატოვება მოსთხოვეს. ევაკუაციის ზონაში ქალაქის ძველი ნაწილი მოხვდა. შენობებს შორის 58 სასტუმრო, მდინარე რაინზე მდებარე სამი ხიდი, მერიის შენობა, რკინიგზის სადგური, მუზეუმები, ერთი საავადმყოფო და ორი მოხუცთა სახლია.

DW-ის ცნობით, კიოლნის მთავარი ღირსშესანიშნაობა, კიოლნის ტაძარი, საფრთხის ზონას მიღმა მდებარეობს.

მეორე მსოფლიო ომის მიმდინარეობისას კიოლნი მოკავშირეთა საჰაერო იერიშების ერთ-ერთი მთავარი სამიზნე იყო. 1942 წლის 31 მაისს გაერთიანებული სამეფოს საჰაერო ძალებმა ქალაქში 1 455 ტონა ბომბი ჩამოაგდეს.