ბოლო დღეებია, ოზურგეთში ხშირია საუბრები იმაზე, თუ ვინ გახდება ოზურგეთის მუნიციპალიტეტის ვიცე-მერი. ვერსია ამ მიმართულებით არაერთი გაჟღერდა. თუმცა, როგორც ჩვენი წყარო ამბობს, აღნიშნულ პოსტზე ყველაზე რეალური კანდიდატი ოზურგეთის წინა მოწვევის საკრებულოს თავმჯდომარის მოადგილე და ”ქართული ოცნების” წევრი გიორგი ღურჯუმელიძეა და ავთანდილ თალაკვაძე ვიცე-მერად სწორედ მას წარადგენს.
აღნიშნული ინფორმაციის გადასამოწმებლად ”გურიაTV”-მ გიორგი ღურჯუმელიძეს მიმართა.
– საუბარია იმაზე, რომ ოზურგეთის ვიცე-მერად შესაძლოა თქვენ გიხილოთ. რამდენად დაადასტურებთ ამ ინფორმაციას?
– მერის პრეროგატივაა მოადგილების დანიშვნა და მერი თვითონ მოახდენს საზოგადოების ინფორმირებას.
– ამ თემაზე თქვენთან კონსულტაციები არ ყოფილა?
– გუნდში კონსულტაციები სხვადასხვა საკითხზე მიმდინარეობს, რაც შეეხება მერის მოადგილეების საკითხს, ეს უშუალოდ მერის პრეროგატივაა და უახლოეს მომავალში წარუდგენს საზოგადოებას.
ოზურგეთის მუნიციპალიტეტის ახლადარჩეული მერი უფლებამოსილების განხორციელებას 22 ნოემბრიდან შეუდგება. სავარაუდოდ მაშინ ან უფრო ადრეც, ახალი კვირის დასაწყისიდან გაირკვევა ვის წარადგენს ავთანდილ თალაკვაძე ვიცე-მერის და მერის მოადგილეების პოსტებზე.
Loading ...