გაუპატიურებასა და თვითმკვლელობამდე მიყვანაში ბრალდებულს წინასწარი პატიმრობა შეეფარდა

გაუპატიურებასა და თვითმკვლელობამდე მიყვანაში ბრალდებულ პირს თბილისის საქალაქო სასამართლომ წინასწარი პატიმრობა შეუფარდა.

სამართალდამცველებმა ბრალდებული – ბ.თ. 6 მაისს დააკავეს. მას ბრალდება საქართველოს სისხლის სამართლის კოდექსის 137-ე მუხლის მე-2 ნაწილის “ბ” ქვეპუნქტით და 115-ე მუხლის პირველი ნაწილით (გაუპატიურება, რამაც მძიმე შედეგი გამოიწვია და თვითმკვლელობამდე მიყვანა, მსხვერპლისადმი მუქარით მისი პატივის და ღირსების სისტემატური დამცირებით) წარედგინა, რაც 8-დან 10 წლამდე თავისუფლების აღკვეთას ითვალისწინებს.

“დადგინდა, რომ 2021 წლის 5  მაისს, თბილისში, ბ.თ. -მ ფსიქოლოგიური ზემოქმედებით და სიცოცხლის მოსპობის მუქარით ა.ა. გააუპატიურა. ბ.თ.-ს ქმედების შედეგადაც  მძიმე ფსიქოტრავმულ მდგომარეობაში მყოფი ა.ა. მერვე სართულიდან გადახტა და სიცოცხლე თვითმკვლელობით დაასრულა” – აცხადებს პროკურატურა.