გაუზიარე სინათლე — საქართველოს მოქალაქეები უკრაინის დასახმარებლად

კამპანიის, გაუზიარე სინათლის ორგანიზატორების ინფორმაციით, 8 დღის განმავლობაში 1176-მა საქართველოს მოქალაქემ გადარიცხა ფული, 9 ადამიანმა გენერატორი პირადად მიაწოდა, რაც მთლიანობაში 200 გენერატორია.

რუსეთმა უკრაინაში თავდასხმები დაიწყო კრიტიკულ სამოქალაქო ინფრასტრუქტურაზე, მათ შორის ენერგიის გადამცემ ხაზებზე, ელექტროსადგურებსა და ქვესადგურებზე.

სწორედ ამის გამო, უკრაინა ზამთრისთვის აქტიურად ითხოვს გენერატორებს. პარტნიორები, ევროკავშირის არაერთი ქვეყანა უკრაინას გენერატორებსა და ტრანსფორმატორებს აწვდიან.

კამპანია 12 დეკემბრამდე გრძელდება, შეგროვებული გენერატორები კი კიევში 24 დეკემბრამდე ჩავა. მსურველებს შეუძლიათ თანხა შესაბამის ანგარიშზე გადარიცხონ. ორგანიზატორების თქმით, ყველა გენერატორს ექნება სტიკერი იმ ადამიანების სახელით და გვარით, ვინც მის ყიდვას შეუწყო ხელი.

ანგარიშის ნომრები: GE07TB7163836070100002 — თიბისი; GE80BG0000000539687194 — საქართველოს ბანკი.

თანხის მიმღებია არასამთავრობო ორგანიზაცია პოპულუს რეი, ჩარიცხვისას დანიშნულებაში მიუთითეთ შემოწირულება.

უკრაინის საელჩოს განცხადებით, საქართველოს მთავრობას 1 თვის წინ სთხოვეს გენერატორები, თუმცა პასუხი არ მიუღიათ.

უკრაინის ელჩის მოვალეობის შემსრულებელმა, ანდრი კასიანოვმა თქვა, რომ უკრაინას ამჟამად უკიდურესად სჭირდება დახმარება ელექტროენერგეტიკული სისტემის აღდგენაში.