მალე გურიას ახალი, მრავალფეროვანი სივრცე ” გარდენია გურიელი” შემოუერთდება. ობიექტზე, რომელიც ოზურგეთის მუნიციპალიტეტის სოფელ გურიანთაში მდებარეობს, განთავსებული იქნება სხვადასხვა ჯიშის ყვავილებით დახ ხე–მცენარეებით გაშენებული ბაღი. ბაღთან ერთად ფუნქციონირებას დაიწყებს, როგორც კაფე, ასევე, რესტორანი.როგორც იდეის ავტორები ”გურიაTV”-ს უყვებიან, ”გარდენია გურიელში” ცალკე ობიეტად განიხილება სივრცე კონკრეტულად გურული სამზარეულოსთვის, სადაც ერთ–ერთი პრიორიტეტული მიმართულება ვეგეტარიანული კვების ხაზი იქნება.
“თუ ადგილობრივ კერძებს თვალს გადავავლებთ, მივხვდებით,რომ გურულ სამზარეულოს ვეგანური გასტრონომიის განვითარების დიდი პოტენციალი აქვს. ასეთია, მაგალითად: გურული მჭადი კეცზე, წყავის ფოთლებით, მწვანე პომიდვრის საცივი, უამრავი სახეობის ლობიო და ფხალეული:კეჟერა, ეკალა, ჭინჭრის, პრასის და კიდევ უამრავი. ვფიქრობთ, ეს სიახლე ვეგეტარიანელებისთვის სასიამოვნო იქნება.” – გვიყვება ნინო ზედგინიძე.
”გარდენია გურიელის” ეზოში უკვე დასრულებულია სათბურების მშენებლობა, სადაც მსურველებს შესაძლებლობა ექნებათ სხვადასხვა ჯიშის ვარდის და ეზოს მცენარეების ნერგები შეიძინონ.
ნინო ზედგინიძე: – “მე მქონდა სახლში ვარდების პატარა ბაღი. თანდათან იმხელა მოთხოვნა წამოვიდა ვარდებზე, რომ გადავწყვიტე შემექმნა ფეისბუქ– გვერდი და დავიწყე ვარდის ნერგების გაყიდვა. შემდეგ ჩემმა მეგობარმა ნონა აფრიდონიძემ შემომთავაზა, გაგვეკეთებინა გარდენია. ობიექტის მოწყობა გასულ ზაფხულს დავიწყეთ. წინ დიდი შრომა გვაქვს, მაგრამ მიზნის მისაღწევად თავდაუზოგავად ვმუშაობთ. ძალიან გვინდა ზუსტად ისეთი გამოვიდეს, როგორიც ჩავიფიქრეთ და იმედია, ასეც იქნება.”
იქამდე, ვიდრე ”გარდენია გურიელი” სრულად დაიწყებს ფუნქციონირებას, ობიეტზე უკვე ამუშავდა ბაღების მოწყობის სერვისი. მომხმარებელს საშუალებას აქვს საკუთარი ბაღი ”გარდენია გურიელის” მებაღეების დახმარებით, სასურველი დიზაინით და მცენარეებით მოაწყოს.
ობიექტის გახსნა ზაფხულისთვის არის დაგეგმილი. იდეის ავტორები დარწმუნებულები არიან, რომ ”გარდენია გურიელი” სტუმრებისთვის გართობისა და განტვირთვისთვის საუკეთესო ადგილად იქცევა.
მასალა პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში დიკო მუჯირმა მოამზადა.
Loading ...