დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი ამირან გამყრელიძე საერთო კოვზით ზიარების შესახებ დასმულ შეკითხვას უპასუხა „ტვ პირველის“ ეთერში.
„მე მესმის, ძალიან რთული კითხვაა, ამ კითხვაზე პასუხი არ არის მარტივი, როდესაც ჩვენ ვსაუბრობთ და ვეხებით საქართველოში ყველაზე უფრო პატივსაცემ და ყველაზე უფრო მაღალრეიტინგულ ინსტიტუციას და განსაკუთრებით მის უწმინდესობას. ამასთან დაკავშირებით, გეტყვით ასეთ რამეს. მე მაქვს ეს ბედნიერება, რომ გარკვეული პერიოდულობით მქონდეს პირადად კონტაქტი მის უწმინდესობასთან, დიდი ხნის განმავლობაში, გამომდინარე ჩემი ისტორიიდან. ეს ადამიანი ბრძენია და ყოველთვის მარიგებს: „ამირან, ასწავლით ბავშვებს ჰიგიენას? ხელები როგორ უნდა დაიბანონ სკოლაში; როგორ უნდა გამოიხეხონ კბილები; რამდენჯერ უნდა გააკეთონ ეს“. ეს არის საფუძველი ცხოვრების ჯანსაღი წესისა და ჯანმრთელობისა. ასეც არის. ჰიგიენა და სანიტარია ყველა დროის ათ ყველაზე დიდ სამედიცინო მიღწევას შორის, ერთ-ერთ ყველაზე დიდ გარღვევად მიიჩნევა“, – თქვა ამირან გამყრელიძემ,
საქართველოს მართლმადიდებელ ეკლესიასთან კომუნიკაციის თემაზე გამყრელიძემ ისიც აღნიშნა, რომ მსოფლიოში კორონავირუსის ინფექციის გავრცელების შემდეგ საპატრიარქოს დაუკავშირდა და შემდეგ დაავადებათა კონტროლის ცენტრმა შესაბამისი გადამზადების ღონისძიებები გაატარა საპატრიარქოში და ერთ-ერთ დიდ ეპარქიაში.
„დედაოებს, მამაოებს, ასევე ძალიან ბევრ ადამიანს შესაბამის ჰიგიენურ წესებზე ჰიგიენური ტრენინგი ჩავუტარეთ. საპატრიარქოს გადავეცით დისპენსერები. ბევრი ადამიანი მიდის… რა თქმა უნდა, საქმის კურსში ჩავაყენეთ, რა შეიძლება მოხდეს“, – თქვა გამყრელიძემ.
რაც შეეხება საერთო კოვზით ზიარების შესახებ დასმულ შეკითხვას, გამყრელიძე ამბობს, რომ მისი რეკომენდაციით გასაძლიერებელია ზოგადი ჰიგიენური წესების დაცვა და საჭიროა: ხშირად ხელების დაბანა; სველი წესით დალაგება;დეზინფეაცია; პირბადეების ერთჯერადი გამოყენება და ა.შ.
„ეს არის ჩემი რეკომენდაცია ყველასადმი, საპატრიარქოსადმი, ეკლესიისადმი. ის კი არა, ეკლესიას შევთავაზე მაშინაც [შეხვედრის დროს], რომ, სადაც მრევლი იკრიბება, იქ იდგას დისპენსერები, სადაც ჩვენ შესვლის და გამოსვლის შემდეგ ხელებს დავიბანთ“, – თქვა ამირან გამყრელიძე.
დაავადებათა კონტროლის ცენტრის ხელმძღვანელი პატრიარქთან შეხვედრას კვლავ გეგმავს: „მე ველოდები, რომ ხვალ, ზეგ მის უწმინდესობას ვეახლო და ამ საკითხზე ვესაუბრო. მაგრამ ვერ მივცემ რეკომენდაციას, რომ რამე რიტუალი შეიცვალოს. მე ვიძლევი რეკომენდაციას, რომ საჭიროა ჰიგიენური წესების დაცვა, რომელიც ეხება იმ რიტუალსაც“.
როგორც ამირან გამყრელიძე განმარტავს, საზოგადოებრივი კანონი თუ ირღვევა, ეს ყველამ უნდა გაითვალისწინოს. „ვაშენებთ, ან ავაშენეთ სამართლებრივი სახელმწიფო. ყველა ერთნი ვართ კანონის წინაშე“, – შენიშნა მან.
ამირან გამყრელიძემ 1 მარტს საერთო კოვზით ზიარების მიზანშეწონილობის შესახებ დასმულ შეკითხვაზე უპასუხა, რომ დაავადებათა კონტროლის ეროვნული ცენტრი რელიგიურ რიტუალებთან დაკავშირებით რეკომენდაციებს ვერ გასცემს.
საპატრიარქომ 29 თებერვალს გამოაქვეყნა განცხადება, რომელშიც ერთი კოვზით ზიარების შესახებ მიუთითებს:
„ზიარებისთვის ერთი კოვზის გამოყენების პრაქტიკა ათასწლოვან ისტორიას ითვლის. ამ ხნის მანძილზე არაერთხელ ჰქონდა ადგილი სხვადასხვა სახის სიცოცხლისათვის საშიში ინფექციის გავრცელებას. ასეთ პერიოდებში მართლმადიდებელი მორწმუნენი არათუ უშინდებოდნენ საერთო ბარძიმიდან საერთო კოვზით ზიარებას, პირიქით, კიდევ უფრო ხშირად მიეახლებოდნენ ამ სიწმინდეს, რადგან, როგორც ყველამ ვიცით, წმინდა ზიარებისას ადამიანი იღებს ქრისტეს წმინდა სისხლსა და ხორცს, – განმწმენდელსა და მაკურნებელს სულისა და ხორცისა“.
www.radiotavisupleba.ge
Loading ...
