ქეთი ცეცხლაძე 27 წლისაა. იგი ოზურგეთში ცხოვრობს. 7 წელია ექთანია და ამ დროის განმავლობაში მოახერხა თბილი, ყურადღებიანი და პროფესიონალი მედპერსონალის სახელის მოხვეჭა. დღეს ის კორონავირუსთან ბრძოლის ფრონტზე წინა ხაზზეა – დიახ, წინა ხაზზე, ბათუმში, კლინიკა მედალფაში, რომელიც კოვიდ 19 – ის მიმღები კლინიკაა. აქ, ექიმები, ექთნები, სანიტრები მენეჯმენტთან ერთად 24 საათის განმავლობაში სიკვდილზე გამარჯვებას ცდილობენ და ეს კარგად გამოსდით – ამ კლინიკას უკვე 14 გამოჯანმრთელებული პაციენტი ჰყავს. ქეთი ცეცხლაძეც ამ გუნდიდანაა. მან თავად გამოთქვა სურვილი სამუშაოდ ოზურგეთიდან ბათუმში გადასულიყო და ამ რთულ დროს, მაშიმ როცა ბევრმა ექიმმა და ექთანმა უარი თქვა მუშაობაზე, საკუთარი სიცოცხლის რისკის ფასად ჩვენს ჯანმრთელობაზე ეზრუნა.
– გადავწყვიტე იმიტომ, რომ ჩემს კოლეგებს და ჩემს ქვეყანას გვერდით დავდგომოდი ამ მძიმე პერიოდში, – ასე ხსნის ქეთი საკუთარ გადაწყვეტილებას “გურიაTV” – სთან საუბრისას. ამბობs, რომ ამ დაძაბულ რეჟიმში, საფრთხის ქვეშ მუშაობა რთულია, თუმცა, არა შეუძლებელი.
– მაქსიმალური თავდაცვა გვაქვს. 4 საათს ვატარებთ ეკიპირებაში. დასვენების საათებიც საკმარისად გვაქვს დაკარგული ძალების აღსადგენად, – გვიყვება ქეთი, რომელსაც რამდენიმე დღეა ოჯახის წევრები არ უნახავს, რადგან კლინიკის პერსონალი კარანტინის რეჟიმში ცხოვრობს. მათი მორიგეობის დასასრულს, იქვე, საავადმყოფოს გვერდით არსებულ სასტუმროში მიდიან და მეორე მორიგეობამდე იქ რჩებიან. ბათუმის მედალფას კლინიკის მედპერსონალი გარესამყაროსთან მკაცრ იზოლაციაშია. ასეთი გმირი ადამიანების რიცხვი კი, მხოლოდ ამ კლინიკაში, რომელიც ქვეყნის მთავარმა ინფექციონისტმა, თენგიზ ცერცვაძემ ქვეყნის მასშტაბით ერთ-ერთ საუკეთესოდ შეაფასა, 80-ს აღწევს.
Loading ...
