გაიზრდება თუ არა დენის და გაზის ტარიფი საქართველოში ზამთრის პერიოდში – დავით ნარმანიას განმარტება

საქართველოს ენერგეტიკისა და წყალმომარაგების მარეგულირებელი ეროვნული კომისიის ხელმძღვანელის, დავით ნარმანიას განცხადებით, ელექტროენერგიის ტარიფის მატება შემოდგომა-ზამთრის პერიოდში მოსალოდნელი არ არის, ბუნებრივი გაზის სექტორში კი, ტარიფს კომისია დეკემბერში გადახედავს, თუმცა, მისივე განმარტებით, თუ ის ვალუტის კურსი შენარჩუნდება, რაც დღეს არის, ტარიფები არც ამ მიმართულებით შეიცვლება.

ამის შესახებ სემეკის თავმჯდომარემ პარლამენტში ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე განაცხადა, სადაც მან სემეკის საქმიანობის 2021 წლის ანგარიში წარადგინა.

„2021 წელს ენერგეტიკის სექტორში ტარიფები არ გადახედილა, ტარიფები არ გაზრდილა. 2022 წლის 1-ელ იანვრამდე მოქმედებდა ეს ტარიფები, თუმცა, ჩვენ ე.წ. დროებითი ტარიფები კვლავ გავაგრძელეთ. როგორც მოგეხსენებათ, მომდევნო წელს ბაზრის გახსნაა დაგეგმილი, ბაზრის გახსნამდე კი დროებითი ტარიფები რაც აქამდე მოქმედებდა მომდევნო წლის გაზაფხულამდე იმოქმედებს. ამიტომაც, ამ შემოდგომა-ზამთრის განმავლობაში ენერგეტიკის სფეროში არ გველოდება ცვლილება. რაც შეეხება ბუნებრივი გზის სექტორს, ჩვენ გვქონდა დადგენილი 3-წლიანი ტარიფები, რომლის ვადა მთავრდება 2022 წლის ბოლოს, თუმცა, რაიმე სახის არსებით ზრდას ამ ეტაპისთვის არ ველოდებით, თუ ის ვალუტის კურსი შენარჩუნდება, რაც დღეს გვაქვს. ასევე, გრძელვადიანი ხელშეკრულებაა ბუნებრივი გაზის მოწოდებასთან დაკავშირებით აზერბაიჯანთან, რაც გვაძლევს იმის თქმის საშუალებას, რომ თუ ეს მაკროეკონომიკური პარამეტრები შენარჩუნდება დეკემბრის თვეშიც, როდესაც ახალი პარამეტრები უნდა დავადგინოთ, ზრდა მოსალოდნელი არ იქნება“, – განაცხადა ნარმანიამ.

რაც შეეხება მომხმარებელთა ინტერესების დაცვის თვალსაზრისით მიღებულ გადაწყვეტილებებს, სემეკის თავმჯდომარემ აღნიშნა, რომ 2022 წლის 6 თვეში მოქალაქეებისთვის გარკვეული სერვისების დაგვიანებით მიწოდებისთვის კომპენსაციის სახით 185 ათასი ლარი გაიცა, ხოლო ხანდაზმულ დავალიანებებზე 865 ათასი ლარი ჩამოიწერა.