გაზიფიცირების სამუშაოები სოფელ შრომაში

ოზურგეთის მუნიციპალიტეტის სოფელ შრომაში დიდი ხანია მოსახლეობის ერთ-ერთ მთავარ პრობლემად გაზიფიცრება სახელდება. ჯერ კიდევ 2019 წლის 9 ივლისს, ეკონომიკის მინისტრი ნათია თურნავა, ოზურგეთის მუნიციპალიტეტის სოფელ შრომას ეწვია და ადგილობრივ მცხოვრებლებს შეხვდა.

„ოზურგეთის მუნიციპალიტეტის სოფელი შრომა ერთ-ერთია იმ დასახლებებიდან, სადაც 2019-2021 წლებში გაზიფიცირება განხორციელდება, შედეგად კი ადგილობრივი მოსახლეობა ბუნებრივ აირს მიიღებს“ – განაცხადა ნათია თურნავამ.

შეხვედრიდან დაახლოებით 1 წელში სოფელში გაზიფიცირების სამუშაოები დაიწყო და ამ წუთისთვის დასკვნით ეტაპზე იმყოფება.

სოფლის რამდენიმე მკვიდრმა უკვე აანთო გაზი, დანარჩენ მოასხლეობაში კი ბუნებრივი აირის სახლებში შეყვანა ეტაპობრივად მიმდინარეობს.

„რამხელა სიხარული გამოიწვია ამ დღემ ჩემში, 21-ე საუკუნეში ძვლივს გვეღირსა [გაზი]“ – წერს სოციალურ ქსელში სოფელ შრომის მკვიდრი, მზია გიორგაძე.

მისი თქმით, წლებია რაც მოსახლეობას ეს პრობლემა აწუხებს და მადლობას უხდის ყველას ვინც ამ საქმეში იყო ჩართული.

შრომაში გაზიფიცირების სამუშაოები სამწლიანი სამთავრობო გეგმის მიხრედვით მიმდინარეობს, რომლის თანახმად, 2019 – 2021 წლებში გურიის სამივე მუნიციპალიტეტში 25 სოფლის გაზიფიცირებაა დაგეგმილი.

შრომის თემში შემავალი სოფლების (შრომა, ორმეთი, ვაკე, ზედუბანი, ხრიალეთი და მოცვნარი) გაზიფიცირების შედეგად, აშენდება გაზსადენი, რომლის სავარაუდო სიგრძე 95 383 გრძივი მეტრი იქნება. თემში კომლთა რაოდენობაა 1446-ს შეადგენს. უშუალოდ სოფელ შრომაში 233 კომლი გახდება გაზის კომპანიის აბონენტი. პროექტის სავარაუდო ღირებულება 5 263 809 ლარს შეადგენს.

მასალა პროექტის “ჩვენ ვირჩევთ, ჩვენ ვაკონტროლებთ” ფარგლებში, ახალგაზრდა რეპორტიორმა  ავთო ხომერიკმა  მოამზადა.

Funded through the Alumni Grants Program, U.S. Embassy in Georgia/დაფინანსებულია საქართველოში აშშ-ის საელჩოს ალუმნი საგრანტო პროგრამის ფარგლებში.