“გაემიჯნეთ ნაციონალურ მოძრაობას“ – ირაკლი კობახიძე აჭარის მაუწყებლის ჟურნალისტს

„გთხოვთ შეეშვით პროვოკაციას და გაემიჯნეთ ნაციონალურ მოძრაობას,” – ასეთი რეპლიკით დაასრულა „ქართული ოცნების“ ლიდერმა, ირაკლი კობახიძემ ინტერვიუ აჭარის საზოგადოებრივი მაუწყებლის ჟურნალისტთან, საინფორმაციო გამოშვება „მთავარის“ წამყვან თეონა ბაკურიძესთან.

პარლამენტის ყოფილი თავმჯდომარის რეპლიკა, წამყვანის რეპლიკას მოჰყვა. „ისე საუბრობთ ბატონო ირაკლი, რომ არ მცოდნოდა მხარი კანონპროექტს დაუჭირეთ, ვიფიქრებდი რომ წინააღმდეგი ხართ პროპორციული სისტემის“ – უთხრა ჟურნალისტმა ირაკლი კობახიძეს.

კითხვაზე რატომ ფიქრობს, რომ ჟურნალისტი აფელირებულია რაიმე ფორმით ნაციონალურ მოძრაობასთან, პარლამენტის თავმჯდომარემ გაურკვევლად უპასუხა და ეთერიდან გავიდა. 

„ეს არის ჩვენი დისკრედიტაციის მცდელობა, რადგან ჩვენ ვართ საზოგადოებრივი მაუწყებელი და კითხვებს ყველა ტიპის გავლენისგან დამოუკიდებლად ვსვამთ. ეს არ არის პირველი შემთხვევა, როცა ასეთი დისკრეტიტაციის მცდელობა იყო, მსგავსი განცხადება ბიძინა ივანიშვილმაც გააკეთა“ – განაცხადა ჟურნალისტმა.