”გააკეთეთ ყველა საჭირო კვლევა და დაბრუნდით ერთი წლის მერე” – სოფელ გომში ჰესების აშენებასთან დაკავშირებულმა შეხვედრამ ხმაურით ჩაიარა

ოზურგეთის დემოკრატიული ჩართულობის ცენტრში კომპანია ”პარვუს ჯგუფის” წარმომადგენლებმა მედიასთან შეხვედრა გამართეს. აღნიშნული კომპანია მდინარე ბჟუჟას ხეობაში ოთხი ჰესის ”ბასრა1”, ”ბასრა2”, ”ბასრა3” და ”ბასრა4”-ის მშენებლობას ახორციელებს. დღევანდელ შეხვედრაზე კომპანიის წარმომადგენლებმა განხორციელებული და დაგეგმილი სამუშაოები, ასევე ადგილზე ჩატარებული კვლევები წარმოადგინეს.

შეხვედრაზე მოწვეული იყო გარემოსდაცვითი ორგანიზაცია ”ეკოს” დამფუძნებელი ირმა გორდელაძე, რომელიც კომპანიის სამუშაოებს მწვავედ აკრიტიკებს და ”პარვუს ჯგუფისგან” ყველა საჭირო კვლევის ევროპული სტანდარტებით ჩატარებას ითხოვს. ირმა გორდელაძე მიიჩნევს, რომ თუ ჰესები მხოლოდ დღეს წარმოდგენილ ჰიდროლოგიურ, ეკოლოგიურ და სეისმოლოგიურ კვლევებზე დაყრდნობით ასენდება, ბჟუჟას ხეობაში ეკოლოგიური საფრთხეები გაჩნდება, ასევე პრობლემა შეექმნება მოსახლეობასაც.

კომპანიის წარმომადგენლებმა შეხვედრაზე ისაუბრეს ჰესების სიმძლავრეების გაზრდასთან დაკავშირებითაც, რაც სამუშაოების დაწყების დასაწყისში დაგეგმილი არ ყოფილა. როგორც ირმა გორდელაძე ამბობს, კომპანიამ მცირე ჰესების მშენებლობის ნებართვა იმიტომ აიღო, რომ გარემოს საფუძვლიანი და მასშტაბური კვლევები თავიდან აერიდებინა, ხოლო შემდეგ უკვე სიმძლავრეების გაზრდა გადაწყვიტა.

აღნიშნულ პოზიციას კატეგორიულად არ ეთანხმებიან კომპანიის წარმომადგენლები. ”პარვუს ჯგუფი” მიიჩნევს, რომ ადგილზე ყველა საჭირო კვლევა ჩატარებულია და ჰესების მშენებლობა მიდის, როგორც კანონის დაცვით, ასევე, მდინარის ხეობის და ბიომრავალფეროვნების დაზიანების გარეშე.

” ჰესების სიმძლავრეების გაზრდა ასათვისებელი ტერიტორიის გაზრდას არ გამოიწვევს. ჩვენ გამოვიყენებთ მხოლოდ იმ ტერიტორიას, რომელიც თავიდან გვქონდა ათვისებული. ჰესების სიმძლავრე კი გარემოზე მავნე ზემოქმედების გარეშე გაიზრდება” – განაცხადეს კპმპანიის წარმომადგენლებმა.

”შევიდენენ სეისმურად და გეოლოგიურად ურთულეს რელიეფში, აშენებენ ოთხ მცირე ჰესს ბიტკოინებისთვის, ეხლა მოუნდათ სიმძლავრის გაზრდა, დააშრობენ ხეობას. სადაც შევიდნენ, მაგალითად ხევსურეთში, იქაც დააშრეს ჰესები. ჩემთვის ამ საკითხში ავტორიტეტი არ არსებობს, ჩემთვის ავტორიტეტი ეს ხეობა და ხალხია, ამ საქმეს მივყვები ძირამდე, როცა დავრწმუნდები, რომ ყველაფერი სუფთადაა, მაშინ არ არის პრობლემა. ბჟუჟის ხეობა არ დაშრეს, თქვენც გქონდეთ სარგებელი, მაგრამ დამარწმუნეთ, რომ ეს კვლევები ნამდვილი და კვალიფიციურია. გააკეთეთ ყველა საჭირო კვლევა ზუსტად ისე, როგორც საჭიროა, დაბრუნდით ერთი წლის მერე და ვილაპარაკოთ” – ამის შემდეგ ირმა გორდელაძემ შეხვედრა დატოვა.