„ნაციონალური მოძრაობის“ თავმჯდოამრე, თინა ბოკუჩავა აცხადებს, რომ მისი ქმარე კოტე იოსელიანი რამდენიმე საათის განმავლობაში გატაცებული იყო და ზეწოლის შემდეგ ჩააწერინეს ვიდეომიმართვა, რომელშიც ის ბოდიშს უხდის „ქართული ოცნების“ დამფუძნებლის შვილს – უტა ივანიშვილს.
ამის შესახებ ბოკუჩავამ პარტიაში გამართულ ბრიფინგზე ისაუბრა.
„ჩემს მეუღლეს ჩვენს საცხოვრებელთან ღამით ჩაუსაფრდა ხუთი ნიღბიანი პირი. ეს ხუთი პირი მას თავს დაესხა, თუმცა მძიმე ფიზიკური დაზიანებების მიყენება ვერ შეძლეს. ამ ფიზიკური დაპირისპირების შედეგად, ჩემი მეუღლე ჩასვეს ავტომანქანაში, აუხვიეს თვალები და თვალებახვეული და ხელებშეკრული გაიტაცეს უცნობი მიმართულებით. ჩვენთვის შეუძლებელია დავადგინოთ ზუსტი ლოკაცია. დისტანციიდან და ტრაექტორიიდან გამომდინარე ვარაუდობთ, რომ ის გაიტაცეს და მრავალი საათის განმავლობაში იმყოფებოდა ე.წ. მოდულის შენობაში.
ადგილზე მიყვანის შემდეგ გამტაცებლები 8 საათის განმავლობაში ახორციელებდნენ მასზე ზეწოლას, უსახელებდნენ მას ყოველდღიური გადაადგილების მარშრუტს, მათ შორის ჩვენი უფროსი, 10 წლის შვილის სკოლის და 2,5 წლის ტყუპის ბაღის ადგილმდებარეობას.
მთელი ამ დროის განმავლობაში მასზე ხორციელდებოდა მუქარა და მას ემუქრებოდნენ ბავშვების უსაფრთხოებით. მე მთელი ღამის განმავლობაში ვცდილობდი ჩემს მეუღლესთან დაკავშირებას, მას არ აძლევდნენ ტელეფონთან წვდომას“, – თქვა ბოკუჩავამ.
Loading ...