ბაღდადში მოკლულია მაღალი რანგის ირანელი გენერალი ქასემ სულეიმანი

ბაღდადის საერთაშორისო აეროპორტში განხორციელებული სარაკეტო იერიშის დროს მოკლულია ირანის ისლამური რევოლუციის გუშაგთა კორპუსის ქვედანაყოფის „ქუდსის ძალების“ ლიდერი, გენერალი ქასემ სულეიმანი. ამის თაობაზე ინფორმაცია პირველმა ერაყის სახელმწიფო ტელევიზიამ გაავრცელა.

პენტაგონის წარმომადგენელმა დაადასტურა, რომ ეს იყო ამერიკული სამხედრო ოპერაცია, რომელიც პრეზიდენტ ტრამპის განკარგულებით განხორციელდა. სულეიმანი ითვლება ერთ-ერთ ყველაზე გავლენიან ფიგურად ისლამური რევოლუციის გუშაგთა კორპუსსა და ირანის სამხედრო სტრუქტურებში.

სარაკეტო თავდასხმისას სულემანთან ერთად მოკლულია აბუ მაჰდი ალ მუჰანდისი, შეიარაღებული დაჯგუფება სახალხო მობილიზაციის ძალების მეთაურის მოადგილე.

ბაღდადის საერთაშორისო აეროპორტში სარაკეტო თავდასხმა განხორციელდა ერაყის ამერიკულ კონტინგენტსა და პროირანულ შეიარაღებულ ფორმირებებს შორის არსებული მკვეთრად დაძაბული ურთიერთობების ფონზე.

31 დეკემბერს ერაყის დედაქალაქში საპროტესტო გამოსვლების მონაწილეები შეეცადნენ შტურმით აეღოთ საელჩოს შენობების კომპლექსი და მის ტერიტორიაზე შეჭრილიყვნენ. მას შემდეგ, რაც მოიერიშეები უშიშროების ძალებმა მოიგერიეს, ისინი საელჩოს შენობასთან დაბანაკდნენ. ოთხშაბათს დილას კვლავ ეცადნენ საელჩოს ტერიტორიაზე შეჭრას, მაგრამ მოიერიშეები ამჯერად აშშ-ის სამხედროებმა შეაჩერეს ცრემლსადენი გაზის გამოყენებით.

შეკრებილები აკრიტიკებენ აშშ-ის მიერ განხორციელებულ ავიადარტყმებს შიიტური მოძრაობა „ჰიზბოლას“ ბაზების წინააღმდეგ, რასაც 25 ადამიანის სიცოცხლე ემსხვერპლა. აშშ-ის პრეზიდენტმა დონალდ ტრამპმა საელჩოზე თავდასხმაში ირანი დაადანაშაულა. თეირანი უარყოფს ბრალდებებს.

ბაღდადში აშშ-ის საელჩომ გამოაცხადა, რომ მუშაობას წყვეტს საპროტესტო აქციების გამო, რომლებიც დიპლომატიური მისიის გარეთ იმართება 31 დეკემბრიდან. ერაყის უშიშროების ძალები საელჩოს ობიექტების გარშემო ტერიტორიას აკონტროლებენ, მაგრამ აშშ-ის მოქალაქეებს ურჩევენ, არ მიუახლოვდნენ საელჩოს შენობას.

www.radiotavisupleba.ge