ბაგებში, სადაც ბიზნესმენი ლევან კაჭარავა მოკლეს, ექსპერტ-კრიმინალისტები მუშაობენ

ბაგებში, წყნეთის გზაზე, სადაც დღეს ბიზნესმენი ლევან კაჭარავა მოკლეს, ექსპერტ-კრიმინალისტები მუშაობენ. პოლიციას შემთხვევის ადგილი ყვითელი ლენტით აქვს შემოსაზღვრული.

ბიზნესმენის მანქანას რამდენიმე საათის წინ, ცეცხლსასროლი იარაღიდან რამდენიმე ტყვია ესროლეს.

არსებული ინფორმაციით, ის ავტომანქანით მძღოლთან ერთად სახლის მიმართულებით მიდიოდა, რა დროსაც მას ცეცხლი გაუხსნეს.

შემთხვევის ადგილზეა ავტომანქანა, რომლითაც ლევან კაჭარავა გადაადგილდებოდა. კაჭარავა „ტოიოტას“ მარკის ავტომანქანით გადაადგილდებოდა. კაჭარავას მძღოლი შემთხვევის დროს არ დაშავაბულა და ის გამოკითხვაზე პოლიციაში იმყოფება.

გამოძიება სისხლის სამართლის კოდექსის 108-ე (განზრახ მკვლელობა) და 236-ე მუხლებით (ცეცხლსასროლი იარაღის უკანონო შენახვა-ტარება) მიმდინარეობს.

Silk Road Group-ის თანადამფუძნებელი ლევან კაჭარავა 53 წლის იყო. წლების წინ, მან ბიზნესმენ გიორგი რამიშვილთან ერთად კომპანია Silk Road Group დააფუძნა და მისი სამეთვალყურეო საბჭოს წევრი იყო.