აშშ-მა გაყინა ავღანეთის ცენტრალური ბანკის აქტივები ქვეყანაში, რათა მათზე წვდომის საშუალება არ მიეცეს თალიბანის დაჯგუფებას, რომელმაც ქაბულში ძალაუფლება ჩაიგდო ხელში.
ბაიდენის ადმინისტრაციამ ავღანეთის სახსრების გაყინვის გადაწყვეტილება მიიღო 15 აგვისტოს, როცა თალიბები ქაბულში შევიდნენ. საერთაშორისო სავალუტო ფონდის მონაცემებით, აშშ-ის ანგარიშებზე ინახება ცხრა მილიარდი დოლარი, რომელიც ავღანეთის ცენტრალურ ბანკს ეკუთვნის.
მარაგის ძირითადი ნაწილი ინახება New York Federal Reserve Bank-სა და აშშ-ის სხვა საფინანსო ინსტიტუტებში.
თალიბანი აშშ-ის სანქციების სიაშია, რაც იმას ნიშნავს, რომ უცხოეთში არსებულ სახსრებზე წვდომა გაუჭირდება, თუ აშშ-მა და მისმა მოკავშირეებმა არ აღიარეს ახალი ხელისუფლება.
აქტივების გაყინვასთან ერთად ვაშინგტონს შეუძლია ასევე დაბლოკოს საერთაშორისო სავალუტო ფონდისა და მსოფლიო ბანკის დახმარება ავღანეთისთვის.
ავღანეთი მსოფლიოს ერთ-ერთი ყველაზე ღარიბი ქვეყანაა და ძლიერ არის დამოკიდებული საერთაშორისო დახმარებაზე. სამთავრობო ბიუჯეტის სამი მეოთხედი უცხოურ დახმარებაზე მოდის.
აშშ-ის და უცხორეთის ჯარების ავღანეთიდან გასვლის დაწყების შემდეგ თალიბანმა დაიკავა ქვეყნის დიდი ტერიტორია და 15 აგვიტოს ქაბულშიც შევიდა. ავღანეთის პრეზიდენტი, აშრაფ ღანი გაიქცა და ამ ნაბიჯით შეწყვიტა მოვალეობის შესრულება. თალიბანმა გამართა პირველი პრესკონფერენცია და პირობა დადო, რომ არ გაუსწორდება მთავრობის წარმომადგენლებს, რომ დაიცავს ადამიანის უფლებებს შარიათის კანონების ჩარჩოებში.
ქაბულის აეროპორტში გასულ დღეებში ქაოტური ვითარება შეიქმნა უცხოეთში გაქცევის მოსურნეთა დიდი რაოდენობის გამო. უცხოეთის სახელმწიფოები აგრძელებენ თავიანთი მოქალაქეების და მათი ავღანელი თანამშრომლების ქვეყნიდან გაყვანას. თალიბანის მეომრები ქაბულის აეროპორტს არ ემუქრებიან.
Loading ...
