აქციის მონაწილეთა ნაწილი პოლიციის კორდონის საპირისპიროდ განთავსდნენ და ე.წ ცოცხალი ჯაჭვი გააკეთეს

აქციის მონაწილეების ნაწილმა თავისუფლების მოედანზე გადაინაცვლა. ისინი პოლიციის კორდონის საპირისპიროდ განთავსდნენ და ე.წ ცოცხალი ჯაჭვი გააკეთეს.

დემონსტრანტები სკანდირებენ: „ეს ქვეყანა ბიძინასი არასდროს გახდება“; „ეს საქართველო ჩვენია“.

ადგილზე გაშალეს საქართველოს და ევროკავშირის დროშა.

როგორც ცნობილია, თავისუფლების მოედანზე წყლის ჭავლის მანქანები და სპეცტექნიკაა მობილიზებული. კერძოდ, ტერიტორიაზე განლაგებულია წყლის ჭავლის 3 მანქანა. ასევე, ადგილზეა სახანძრო-სამაშველო მანქანები.

შეგახსენებთ პარლამენტის მიმდებარედ აქცია მიმდინარეობს. აქციის მონაწილეებს გადაკეტილი აქვთ საავტომობილო გზა.

მოქალაქეები უკვე 25-ე დღეა საპროტესტო აქციებს მართავენ. პროტესტის მონაწილეების მოთხოვნაა აქციების პერიოდში დაკავებული მოქალაქეების გათავისუფლება და ახალი არჩევნების დანიშვნა. ცნობისთვის, მასშტაბური აქციები “ქართული ოცნების“ 28 ნოემბრის გადაწყვეტილებამ გამოიწვია, რომლის თანახმად, საქართველო 2028 წლის ბოლომდე ევროკავშირთან მოლაპარაკებების გახსნის საკითხს დღის წესრიგში არ დააყენებს.