აქვს თუ არა ვადა გასული საქართველოში ადმინისტრირებულ ვაქცინებს – გამყრელიძის პასუხი

სოციალურ ქსელებში ბოლო პერიოდში ვრცელდება ინფორმაცია, რომლის მიხედვითაც, კლინიკაში ასაცრელად მისულ მოქალაქეებს ექიმები ეუბნებიან, რომ “ფაიზერის” ვაქცინას ვადა 31 დეკემბერს გაუვიდა. აღნიშნული ნელი ვაქცინაციის პირობებში კიდევ ერთი დამაბრკოლებელი ფაქტორი ხდება. როგორც ჩანს, ექიმების ნაწილი ვაქცინის ვარგისიანობის 3 თვით გახანგრძლივების შესახებ ინფორმირებული არაა.
აღსანიშნავია, რომ ამერიკის შეერთებული შტატების სურსათისა და წამლის სააგენტოს (FDA) განცხადებით, თუკი ვაქცინები შესაბამის ტემპერატურულ პირობებში ინახება (საუბარია -90 გრადუსიდან -60 გრადუსამდე), მაშინ ვაქცინის ფლაკონებსა და კოლოფებზე მითითებული ამოწურვის ვადა, შესაძლოა, სამი თვით გახანგრძლივდეს. სწორედ ასე მოხდა „ფაიზერის“ შემთხვევაშიც. FDA-მ ჯერ კიდევ 2021 წლის აგვისტოს მიწურულს გამოაქვეყნა სამედიცინო პერსონალის რეკომენდაციები, რომელიც “ფაიზერის” კოვიდ-ვაქცინის განახლებულ ვადებს შეეხებოდა.
საქართველოს დაავადებათა კონტროლისა და საზოგადოებრივი ჯანმრთელობის ცენტრის ხელმძღვანელი ამირან გამყრელიძე BM.GE-თან საუბრისას განმარტავს, რომ ქვეყანაში ამ დროისთვის ადმინისტრირებული ყველა ვაქცინა ვარგისია. მისივე თქმით, “ფაიზერის” ის პარტია, რომელსაც ძველი თარიღით ვადა ოქტომბერ-ნოემბერში გასდიოდა, ამოწურულია და ამჟამად ქვეყანაში დარჩენილია მხოლოდ ის ვაქცინა, რომლის ვარგისიანობა 31 დეკემბრიდან 31 მარტამდეა გახანგრძლივებული.
გამყრელიძე ამბობს, რომ ვაქცინები შესაბამისი ტემპერატურული რეჟიმის დაცვით ინახება. ის ასევე სამწუხაროს უწოდებს იმას, რომ ექიმების ნაწილს მოქალაქეებამდე არასწორი ინფორმაცია მიაქვთ.
„ქვეყანაში ადმინისტრირებულ არცერთ ვაქცინას ვადა არ აქვს გასული. მოგეხსენებათ დღეს ადმინისტრირდება სამი ვაქცინა – “ფაიზერი”, “სინოვაკი” და “სინოფარმი”. ჩინურ ვაქცინებს ვადა 2023 წლამდე აქვს. რაც შეეხება “ფაიზერს”, კომპანიამ მრავალი კვლევით დაადგინა, რომ ვაქცინებს 6 თვიდან ვადა 9 თვემდე უგრძელდებათ და ეს დააგზავნა ყველა მიმღებ ქვეყანაში. იმ პერიოდში ჩვენთან იყო “ფაიზერის” სხვადასხვა დოზები. იყო ისეთი, რომელსაც ვადა ჰქონდა ოქტომბრის, ნოემბრის და დეკემბრის ბოლომდე, ყველას ვადა გაუგრძელდათ 3-3 თვით. მეც და ჩემი ოჯახის ყველა წევრს გაკეთებული გვაქვს ეს ვაქცინა.
ყველა მათგანისთვის ტემპერატურული რეჟიმების დაცვაზე მუდმივი მონიტორინგი ხორციელდება. ყველაფრის შესახებ ექიმები ინფორმირებულები არიან და გული მწყდება ჩემს კოლეგებზე რომ ასეთ რაღაცებს ამბობენ ხანდახან, თუმცა იშვიათად ხდება ეს”, – განმარტავს გამყრელიძე.
დაავადებათა კონტროლის ეროვნული ცენტრის ხელმძღვანელის თქმით, დღეისათვის საქართველოს “ფაიზერის” ვაქცინის 600 ათასამდე დოზა აქვს, რომელიც 2022 წლის 31 მარტამდეა ვარგისი.